Հայաստանը ցանկություն ունի գերմաներենի խորացված ուսուցմամբ դպրոցներից մեկի հենքի վրա Հայաստանում գերմանական գիմնազիա հիմնել: Այս մասին, այսօր՝ սեպտեմբերի 23-ին, Գերմանիայի Սաքսոնիա-Անհալթ երկրամասի մշակույթի եւ կրթության նախարար Շտեֆան Դորգերլոհի գլխավորած պատվիրակության հետ հանդիպման ժամանակ նշել է ՀՀ կրթության եւ գիտության նախարար Արմեն Աշոտյանը:
Գերմանական պատվիրակության կազմում էին նախարարության դպրոցական կրթության վարչության պետ Թորսթեն Քլիմեն, նախարարության միջազգային եւ ԵՄ հետ կրթական կապերի պատասխանատու Դր. Ուվե Բիրկհոլցը եւ նախարարի օգնական Միխայել Շուլցը: Հանդիպմանը մասնակցել է նաեւ ՀՀ-ում Գերմանիայի արտակարգ եւ լիազոր դեսպան Բերնհարդ Մաթիաս Քիսլերը:
«Կրթության եւ գիտության ոլորտում Գերմանիայի հետ հարաբերությունների ողջ ներկապնակում իր ուրույն եւ ընդգծված տեղն ունի Սաքսոնիա-Անհալթ երկրամասի հետ համագործակցությունը` նաեւ շնորհիվ մեր լավ գործընկեր Շտեֆան Դորգերլոհի, ում արդյունավետ աշխատանքի շնորհիվ բոլոր պլանավորված աշխատանքները կարճ ժամանակահատվածում կյանքի են կոչվում»,-նշել է Արմեն Աշոտյանը` ընդգծելով, որ այդ համագործակցության ամենափայլուն արդյունքն աշակերտական փոխանակման ծրագրերն են, երբ երիտասարդներին տրվում է յուրահատուկ հնարավորություն` սովորել արտերկրում:
Շտեֆան Դորգերլոհն իր հերթին նշել է, որ հայկական հյուրընկալությունն իրապես լեգենդար է: «Նախօրեին հանդիպել եմ Հայաստանի տարբեր դպրոցների աշակերտների հետ: Նշեմ, որ շատ տպավորիչ էր այդ աշակերտների ոչ միայն գերմաներենի իմացության մակարդակը, այլեւ առհասարակ Գերմանիայի մասին գիտելիքների մեծ պաշարը: Հանդիպմանը ներկա էին նաեւ Գերմանիայից փոխանակման ծրագրով Հայասատան այցելած աշակերտներ, ովքեր ցանկանում էին առավել երկար մնալ այս հրաշալի երկրում»,-նշել է Շտեֆան Դորգերլոհը` ընդգծելով, որ փոխանակման ծրագրով արդեն Հայաստան են այցելել Գերմանիայի դպրոցների տնօրեններ եւ ներկայումս հայ տնօրենների հերթն է:
Նա նաեւ տեղեկացրել է, որ մեկ տարի առաջ ՀՀ ԿԳ նախարարի հետ քննարկված` Սաքսոնիա-Անհալթ երկրամասի դպրոցների դասագրքերում Հայոց ցեղասպանության մասին թեման ներառելու խնդիրն իր դրական լուծումն է ստացել: «Այսօր արդեն կարող եմ Ձեզ հանձնել առաջին, նոր տպագրված ձեռնարկը, որի առաջին 4 գլուխները վերաբերում են Ցեղասպանություններին, այդ թվում` Հայոց ցեղասպանությանը»,-նշել է Շտեֆան Դորգերլոհը` Արմեն Աշոտյանին հանձնելով ձեռնարկի օրինակը:
ՀՀ կրթության եւ գիտության նախարարը. շնորհակալություն հայտնելով վերոնշյալ նախաձեռնության համար, նշել է, որ շատ հուզիչ եւ հատկանշական է, երբ ձեռնարկը տպագրվում է Հայոց ցեղասպանության 100-րդ տարելիցին: Արմեն Աշոտյանն առաջարկել է գերմանական գիմնազիայի եւ երկրամասի դպրոցներում Հայոց ցեղասպանության մասին թեման ներառելու փորձը ներկայացնել Գերմանիայի կրթության եւ մշակույթի նախարարների ֆեդերալ համայնքի նիստին:
Հանդիպման ընթացքում անդրադարձ է կատարվել նաեւ Հայաստանում Գյոթեի ինստիտուտի լեզվական կենտրոնի աշխատանքներին:
