Չինաստանի կառավարության ղեկավարը կարգադրել է ուսումնասիրել «Իրան- Հայաստան» երկաթգծային ճանապարհի շինարարության նախագծի սոցիալ-տնտեսական ասպեկտը, դիտարկել ապրանքների այն ծավալը, որը հնարավոր կլինի տեղափոխել երկաթգծային ճանապարհով՝ միաժամանակ նշելով, որ ճանապարհի այդ հատվածը Մետաքսի ճանապարհի պատմական մասն է: Այս մասին ՀՀ Կառավարության սեպտեմբերի 25 –ի նիստից հետո լրագրողների հետ զրույցում հայտնեց Էկոնոմիկայի նախարար Կարեն Ճշմարիտյանը՝ ամփոփելով ՀՀ կառավարական պատվիրակության Չինաստան կատարած ուղեւորության արդյունքները:
Ճշմարիտյանի խոսքով, չինական կողմը հետաքրքրություն է դրսեւորում «Իրան- Հայաստան» երկաթգծային ճանապարհի շինարարության նկատմամբ, ու եթե նրա համար այդ նախագիծը տնտեսապես շահավետ լինի,ապա կհամաձայնի մասամբ ֆինանսավորել այն: «Նրանց գլխավոր նպատակը Չինաստանը Եվրոպայի հետ երկաթգծային հաղորդակցությամբ միացնելն է: Կարծում եմ, որ նրանց պատասխանը չի ուշանա: Եթե դա նրանց համար շահավետ համարվի, ապա Չինաստանն այդ հատվածի շինարարության համար 3.2 մլրդ դոլար կհատկացնի»,- ասաց նախարարը:
Կարեն Ճշմարիտյանը նաեւ նշեց, որ գործընկերների հետ հանդիպման ժամանակ, ի թիվս շատ այլ հարցերի, քննարկվել է «Հյուսիս-Հարավ» միջպետական ավտոմոբիլային ճանապարհի շինարարությանը չինական ընկերությունների մասնակցության, ապակու արտադրություն կազմակերպելու, նաեւ Հայաստանի ցեմենտի արտադրության մեջ նոր տեխնոլոգիաներ ներդնելու հարցերը: Էկոնոմիկայի նախարարի խոսքով քննարկվել են նաեւ զբոսաշրջության զարգացմանը վերաբերող հարցեր եւ չինական «Այր Չայնա» ավիաընկերության թռիչքների իրականացման հնարավորությունը: