Հոկտեմբերի 1-ի առավոտյան Եվրախորհրդի Խորհրդարանական վեհաժողովի Սոցիալական, առողջապահության եւ կայուն զարգացման հարցերի հանձնաժողովում (ԵԽԽՎ) սպասվում են Սարսանգի ջրամբարի մասին՝ հայկական կողմի համար անընդունելի զեկույցի նախապատրաստման ընթացքի մասին քննարկումները: Այս մասին NEWS.am-ի թղթակցի հետ զրույցում հայտարարեց ԵԽԽՎ-ում Հայաստանի պատվիրակության անդամ, ԲՀԿ ղեկավար Նաիրա Զոհրաբյանը:
Պատգամավորը հիշեցրեց, որ, ի տարբերություն Ռոբերտ Վոլտերի, ով, ամեն դեպքում, դիմել էր Լեռնային Ղարաբաղի ներկայացուցչություն, Սարսանգի ջրամբարի հարցով բոսնիացի զեկուցող Մելիսա Մարկովիչը հրաժարվում է դա անել:
«Նա ամենուր հայտարարում է, որ իրեն արգելում են Լեռնային Ղարաբաղ այցելել, բայց այդպես չէ: Կանոնակարգն այսպես է. Լեռնային Ղարաբաղի Հանրապետության իշխանությունները պետք է այս կամ այն զեկուցողին թույլ տան այցելել իրենց երկիր: Մենք Մելիսա Մարկովիչին բազմիցս առաջարկել ենք հետեւել կանոնակարգին, բայց նա հրաժարվում է»,- նշեց Զոհրաբյանը:
Պատգամավորի խոսքով, Մելիսա Մարկովիչը մտադիր է ժամանել Հայաստան եւ, բավարարվելով միայն Երեւան այցով, զեկույց գրել Սարսանգի ջրամբարի մասին: «Ամեն անգամ մենք նրան մանրամասն բացատրում ենք, որ Հայաստանում Սանսանգ անվանումով ջրամբար գոյություն չունի»,- ընդգծեց Նաիրա Զոհրաբյանը:
