ԱՄՆ-ում աճուրդում 102 հազար դոլարով վաճառվել են կինոռեժիսոր եւ սցենարի հեղինակ Օրսոն Ուելսի ձեռագրերը՝ այդ թվում ամերիկյան 100 լավագույն ֆիլմերի ցանկում առաջին տեղը զբաղեցրած «Քաղաքացի Քեյն» ֆիլմի սցենարի վերջնական տարբերակը, հայտնում է «ՌԻԱ Նովոստին»՝ վկայակոչելով «Ասոշիեյթիդ փրես» գործակալությունը:
Սցենարների երեք տարբերակները տրամադրել էր Profiles in History ընկերությունը: Փաստաթղթերը վաճառքի էր դրել Ուելսի ընկերը, ով սցենարի ձեռագրերը անձամբ դրանց հեղինակից էր ստացել:
Ամենամեծ գումարը առաջարկվել է ֆիլմի սցենարի երրորդ՝ վերջնական տարբերակի համար: Ձեռագիրը վաճառվել է 44.8 հազար դոլարով:
Բացի դրանից աճուրդի էին դրվել նաեւ Ուելսի եւս մի քանի ձեռագիր փաստաթղթեր, որոնք տրամադրել էին ուրիշ սեփականատերեր: Դրանցից մեկն էր Հերբերտ Ուելսի «Աշխարհների պատերազմը»վեպի հիման վրա 1938 թ. Օրսոն Ուելսի բեմադրած ռադիոթատրոնը, որը մեծ աղմուկ էր հանել: