Հանրային ծառայությունները կարգավորող հանձնաժողովը վաղը՝ հոկտեմբերի 1-ին, կհաստատի թույլտվությունը՝ «Հայաստանի էլեկտրական ցանցեր» ՓԲԸ 100 տոկոս բաժնետոմսերը վաճառելու «Լիորմանդ Հոլդինգզ Լիմիթեդ» ընկերությանը: Այս մասին NEWS.am-ը տեղեկացավ ՀԾԿՀ-ի կայքից:
Որոշումն ուժի մեջ կմտնի ստորագրման պահին:
Նշենք, որ այսօր Vedomosti-ն, վկայակոչելով «Ինտեր ՌԱՕ» ընկերությունը, հայտնել էր, որ «Տաշիր» խումբն ու «Ինտեր ՌԱՕ» ընկերությունը «Հայաստանի էլեկտրական ցանցեր» ընկերության առք ու վաճառքի վերաբերյալ պայմանագիր են ստորագրել:
Հիշեցնենք, որ սեպտեմբերի 17-ին կառավարության նիստում ՀՀ էներգետիկայի եւ բնական պաշարների նախարար Երվանդ Զախարյան հայտարարել է, որ «ՀԷՑ»-ի 100 տոկոսի սեփականատեր «Inter RAO Holding B. V.» ընկերությունը հայտ է ներկայացրել ՀԷՑ-ի բաժնետոմսերը «Լիորմանդ Հոլդինգզ Լիմիթեդ»-ին օտարելու վերաբերյալ:
Նշենք, որ Liormand Holdings Limited ընկերությունը գրանցված է Կիպրոսում 2010 թվականի նոյեմբերից: Համապատասխան տվյալները հրապարակել է i-cyprus.com ոչ պաշտոնական կայքը, որը տեղեկություններ է ներկայացնում Կիպրոսի ռեգիստրում գրանցված ձեռնարկությունների մասին: