ԱՄՆ Քալիֆորնիա նահանգի Գլենդել քաղաքում երկուշաբթի օրը դանակահարված հայ տղամարդը մահացել է հիվանդանոցում երկու օր անց։
Burbank Leader-ի փոխանցմամբ, երկուշաբթի գիշերը Սանլենդի 30-ամյա բնակիչ Մինաս Հարությունյանը հարձակման էր ենթարկվել Գլենդելի 57-ամյա բնակիչ Ալեքս Լիթլջոնի կողմից։ Հարությունյանը դանակի մի քանի հարված էր ստացել, բայց կարողացել էր դիմադրել եւ սպանել Լիթլջոնին։
Գլենդելի ոստիկանության ներկայացուցիչ Թահնի Լայթֆութի խոսքով, դեպքից հետո Հարությունյանը հասել էր ոստիկանություն եւ ահազանգել․ Իրավապահներն ու բժիշկները նրան արյունոտ վիճակում գտել էին բաժանմունքի մոտ։ Դատարանի մոտ էլ գտել էին Լիթլջոնի դին։ Դեպքի վայրում հայտանբերվել էր նաեւ դանակը։ Մինաս Հարությունյանին տեղափոխել էին հիվանդանոց, որտեղ բժիշկներին չէր հաջողվել փրկել նրա կյանքը, երկու օր անց նա մահացել է։
Հարձակման պատճառները դեռ հայտնի չեն, ընթանում է հետաքննություն։