Այս պահին ամենակարեւորն այն է, որ ղարաբաղյան հակամարտության շփման գոտում չկրկնվեն հրադադարի խախտման դեպքերը։ Այդ մասին հոկտեմբերի 2-ին մամուլի ասուլիսի ընթացքում հայտարարել է Հայաստանում Գերմանիայի Արտակարգ եւ լիազոր դեսպան Մաթիաս Քիսլերը։
«Մենք մտահոգված ենք այն իրադարձություններով, որոնք վերջին շաբաթներին եւ օրերին տեղի են ունեցել ղարաբաղյան հակամարտության շփման գոտում։ Շատ կարեւոր է, որ սրացումը կանխվի։ Դրա համար գոյություն ունի ԵԱՀԿ-ի Մինսկի խումբը, դա նրանց գործն է,-ընդգծել է Քիսլերը։ Խնդիր է դրված,-շարունակել է դեսպանը,- թուլացնել լարվածությունը եւ փոխըմբռնման մթնոլորտ ստեղծել, որը հիմք կդառնա հակամարտության խաղաղ կարգավորման համար։ Հաջորդ տարի Գերմանիան ԵԱՀԿ-ի համանախագահող երկիր կլինի։ Եվ հավատացեք, Գերմանիան ամեն հնարավորը կանի նպաստելու հակամարտության խաղաղ կարգավորմանը,-ավելացրել է Մաթիաս Քիսլերը։ ԵԱՀԿ-ի Մինսկի խումբը,-եւս մեկ անգամ ընդգծել է դիվանագետը,- ղարաբաղյան հակամարտության լուծումներ որոնելու ճիշտ ձեւաչափ է»։
Ինչպես ավելի վաղ հաղորդել էր NEWS.am-ը, սեպտեմբերի 25-ին 17.30-ին ադրբեջանական զինված ուժերը թուրքական արտադրության TR-107 համակարգերից հրթիռա-հրետանային կրակ են բացել Ղարաբաղի պաշտպանական բանակի զորամասերից մեկի վրա, որը տեղակայված է հյուսիս-արեւելյան ուղղությամբ։ Հրետակոծության հետեւանքով 4 մարդ զոհվել է, 16 զինվորական բեկորային վնասվածքներ է ստացել։ Նախիջեւանում տեղակայված Ադրբեջանի զինված ուժերի ստորաբաժանումներից մեկը հոկտեմբերի 1-ին 22.30-ին հայկական կողմի համար անհայտ պատճառով փորձել է խախտել Հայաստանի հարավ-արեւմտյան սահմանը հայկական Երասխ գյուղի ուղղությամբ։ Բայց հակառակորդի փորձը նկատվել է միջդիրքային տարածքում եւ կասեցվել Հայաստանի ԶՈՒ-ի կողմից, փոխհրաձգության արդյունքում հակառակորդը նահանջել է։