Օսմանյան կառավարությունը մոտ 100 տարի առաջ՝ 1915-ին ցեղասպանություն է իրականացրել որոշ քանակությամբ հայերի նկատմամբ, ու թեեւ ներկայումս վերացել է Օսմանյան կառավարությունը, դեռեւս Հայաստանը Թուրքիայից ուզում է, որպեսզի նա այդ խնդրի համար պաշտոնապես ներողություն խնդրի եւ փոխհատուցում վճարի: Այդ մասին, ըստ IRNA գործակալության, հայտարարել է Իրանի փոխնախագահ, Իրանի մշակութային ժառանգության, ձեռարվեստի եւ զբոսաշրջության կազմակերպության նախագահ Համիդ Բաղային «Իրան. հաղթանակի կամուրջ» համաժողովի ժամանակ:
Համաժողովն անցկացվել է Երկրորդ համաշխարհային պատերազմում դաշնակիցների կողմից Իրանի գրավման 70-րդ տարելիցի կապակցությամբ:
Պաշտոնյան նշել է նաեւ, որ երկրորդ համաշխարհային պատերազմի ժամանակ Իրանին հասցված վնասների վերաբերյալ պատմական փաստաթղթերի համաձայն՝ այդ խնդիրը միջազգային հանրությունում իրավական հետեւանքներ պետք է ունենա:
Բաղային նշել է. «Մենք պարտավոր ենք միջազգային հանրությունում հետեւել այս խնդրին, ինչու, որովհետեւ հակառակ դեպքում պատմության մեջ պարտական կլինենք մեր ժողովրդին»: Ըստ նրա՝ այդ խնդրի նկատմամբ հետեւողականությունը Իրանի ժողովրդի ցանկությունն է, դա ունի նաեւ քաղաքական ենթատեքստ եւ միջազգային հանրությունում այն ներկայացնելով կարելի է Ամերիկային, Ռուսաստանին եւ Անգլիային զրկել հպարտ կեցվածքից եւ հասկացնել, որ Իրանը Երկրորդ համաշխարհային պատերազմում նրանց ոչնչացման խոչընդոտն է եղել:
«Թեեւ Ճապոնիան Առաջին համաշխարհային պատերազմում հիմնական կողմ էր հանդիսանում, սակայն ներկայումս Ամերիկայից փոխհատուցում ստանալու պահանջատեր է դարձել` ատոմային ռումբերից հասցված վնասների համար»,- ասել է նա:
Բաղային անդրադարձել է պատերազմի ժամանակ Իրանին հասցված վնասներից մի մասին եւ ասել. «Իրանը գրավելու 5 տարիների ընթացքում մեր նավթը գնվել է ցածր գներով, կողոպտվել են պարենն ու ժողովրդի կեցության անհրաժեշտ ապրանքները, սպանվել են մեծ թվով մարդիկ եւ ոտնձգության է ենթարկվել նրանց պատվախնդրությունը, եւ այդ վնասներն այնքան ծանր էին, որ երկիրը հետ գցեց 50 տարով»: