Թուրքիան նախկինի պես աջակցելու է Ադրբեջանին ղարաբաղյան հակամարտության կարգավորման հարցում։ Այս մասին Trend  գործակալությանը տված հարցազրույցում հայտնել է Թուրքիայի ԶՈՒ Գլխավոր շտաբի պետ Հուլուսի Աքարը։

Նրա խոսքով՝ Թուրքիան ակնկալում է, որ միջազգային հանրությունը Ղարաբաղի խնդրի կարգավորման հարցում նույնպիսի արձագանք կդրսեւորի, ինչպիսին որ Ուկրաինայի հարցում։ Աքարը իր կարծիքը հիմնավորել է 2015թ. հունիսին ՄԻԵԴ-ի ընդունած որոշմամբ։ «Մարդու իրավունքների եվրոպական դատարանը իրավաբանորեն ապացուցել է Հայաստանի դիրքորոշման անիրավացիությունը եւ այն, որ այդ երկիրը ղարաբաղյան  հակամարտության կարգավորման գործում հիմնական խնդիրն է»,- ասել է Թուրքիայի ԶՈՒ Գլխավոր շտաբի պետը։

Հիշեցնենք, որ ՄԻԵԴ-ը 2015թ. հունիսին որոշում էր կայացրել 2 նախադեպային գործերով. Սարգսյանն ընդդեմ Ադրբեջանի եւ Չիրագովն ընդդեմ Հայաստանի։ Երկու հայցն էլ բավարարվել էին։ Ադրբեջանական կողմը ՄԻԵԴ որոշումը յուրովի էր հասկացել՝ այն ներկայացնելով որպես հավանություն։