ԵԽԽՎ Մշտադիտարկման հանձնաժողովը դրական է գնահատում սահմանադրական բարեփոխումների նախագիծը։ Այս մասին հոկտեմբերի 6-ին լրագրողներին հայտնել է ՀՀ խորհրդարանի փոխխոսնակ, ԵԽԽՎ-ում Հայաստանի պատվիրակության ղեկավար Հերմինե Նաղդալյանը։
Նա հիշեցրել է, որ Մշտադիտարկման հանձնաժողովն արդեն առաջին անգամը չէ, որ ողջունում է սահմանադրական բարեփոխումները։ Ավելի վաղ իրենց հավանությունն էին տվել Հայաստանի հարցով ԵԽԽՎ համազեկուցող Ալան Միլն ու Ակսել Ֆիշերը։ «Սեպտեմբերի 29-ին Հանձնաժողովը համապատասխան հայտարարություն էր ընդունել եւ այն, կարծում եմ, ամփոփիչ գնահատականն է այն դրական աճի, որին մենք հասել ենք։ Մենք հայտարարել ենք, որ փոփոխությունների ճակատագիրը կախված կլինի միայն համաժողովրդական քվեարկությունից,- ասել է Նաղդալյանը։
Հանձնաժողովի հայտարարության մեջ նշվում է, որ բարեփոխումները բուռն քննարկումներ են առաջ բերել հայ հասարակության շրջանում։ Քաղաքական համակարգի ընտրողը ՀՀ քաղաքացիներն են լինելու եւ միայն նրանք։ Այդ պատճառով Հանձնաժողովը քաղաքական դաշտի խաղացողներին կոչ է անում հանրաքվեի կազմակերպումը ապահովել բարձր ժողովրդավարական ստանդարտների մակարդակով։
Հիշեցնենք, որ ՀՀ խորհրդարանը հոկտեմբերի 5-ին կողմ էր քվեարկել սահմանադրական փոփոխություններին, որով նախատեսվում է անցում կատարել կառավարման խորհրդարանական համակարգի։ Հանրաքվեն կկայանա դեկտեմբերին։
