Նաիրա Զոհրաբյանն արժանի պատասխան է տվել Ադրբեջանի պատվիրակությանը։ Այս մասին հոկտեմբերի 6-ին ՀՀ խորհրդարանում լրագրողներին ասել է ԵԽԽՎ-ում Հայաստանի պատվիրակության անդամ Վահան Բաբայանը՝ մեկնաբանելով պատվիրակության անդամ Նաիրա Զոհրաբյանի ելույթը։

Զոհրաբյանի  ելույթը ադրբեջանցի պատգամավոր Ռաֆայել Հուսեյնովի՝ «Կրոնի ազատություն եւ համագոյակցությունը ժողովրդավարական հասարակություններում» զեկույցի պատասխանն էր։

«Նաիրա Զոհրաբյանի պատասխանը տպավորեց եվրոպական պատվիրակություններին եւ ճիշտ դասավորեց շեշտադրումները՝ առանց ջղաձգությունների եւ զայրույթի նշույլի»,- նշեց Բաբայանը։

Նշենք, որ Նաիրա Զոհրաբյանն իր հայտարարության մեջ հիշեցրել է Ջուղայի գերեզմանոցում ադրբեջանական զորքերի իրականացրած վանդալիզիմի  մասին։ Ոչ ՅՈՒՆԵՍԿՕ-ի, ոչ Եվրոպական խորհրդարանի, ոչ Եվրոպայի խորհրդի եւ միջազգային հանրության կոշտ արձագանքը չկասեցրեցին ադրբեջանական վանդալիզմը, ինչը դատապարտեց նաեւ Վատիկանը: 2006 թվականին ադրբեջանցի լրագրող Իդրակ Աբասովը այցելեց Ջուղայի գերեզմանոց և գրեց, որ այն «ամբողջովին անհետացել է»: Նույն թվականին Եվրոպական խորհրդարանի անդամներին Ադրբեջանը թույլ չտվեց այցելել Ջուղայի գերեզմանոց։ Նույն կերպ վարվեցին մեր գործընկեր Օ՝ Հարայի հետ՝ թույլ չտալով տեսնել ադրբեջանական վանդալիզմի իրական դեմքը։ 2006 թվականի փետրվարի 16-ին Եվրոպական խորհրդարանն ընդունեց բանաձև՝ դատապարտելով Ջուղայի միջնադարյան գերեզմանոցի ոչնչացումը։ Սակայն համաշխարհային մշակույթի բացառիկ արժեքներն արդեն ոչնչացված էին։