Պատժամիջոցների վերացումից մի քանի ամիս անց Իրանը կկարողանա 500 հազար բարելով ավելացնել նավթի արդյունահանումը։ Այս մասին Oil and Money համաժողովի միջանցքներում լրագրողներին հայտնել է Նավթի նախարարությանը կից Իրանական վերստուգիչ կոմիտեի նախագահ Մեհդի Հոսեյնին։
«Երբ պատժամիջոցները հանվեն, մի քանի ամիս անց մենք կկարողանանք օրական 500 հազար բարելով ավելացնել նավթի արդյունահանումը», - ասել է նա, փոխանցում է ՏԱՍՍ-ը։
Հոսեյնին ենթադրել է, թե նավթի արդյունահանումն օրական 1 միլիոն բարելով ավելացնելը «մոտ մեկ տարի» կպահանջի։ «Կարծում եմ, որ հունվարին պատժամիջոցները կհանվեն։ Պատժամիջոցային կառուցվածքն այլեւս չի գործում»։
Մինչեւ ատոմային ծրագիր ստեղծելու հետեւանքով Թեհրանի դեմ ԵՄ-ի, ԱՄՆ-ի եւ ՄԱԿ-ի կողմից պատժամիջոցների սահմանումը, Իրանում նավթի արդյունահանումն օրական մոտ 4,1 միլիոն բարել էր կազմում։ Դրանից օրական 2,5 միլիոն բարելն արտահանվում էր։
Որոշ գնահատականների համաձայն, ներկայումս Իրանն օրական 2,8 միլիոն բարել նավթ է արդյունահանում։