Միկրոբլոգների ծառայությունը թողարկում է Moments («Պահեր») գործառույթը, որը թույլ է տալիս ռեալ աշխարհում հետեւել կարեւոր իրադարձություններին։
Նոր գործառույթի օգնությամբ օգտատերերը կկարողանան սոցցանցում ծանոթանալ հանրության ուշադրության կենտրոնում գտնվող իրադարձություններին, հետեւել դրանց զարգացմանը կամ էլ ուսումնասիրել դրանց ընթացքը իրադարձությունների ավարտից հետո։ Օգտատերը կկարողանա բաժանորդագրվել որեւէ «պահի», որից հետո իր ժապավենում կտեսնի այդ միջոցառմանը նվիրված թվիթները։ Ավարտվելուց հետո «պահը» կկորի եւ դրա հետ միաժամանակ կանհետանան նաեւ դրան վերաբերող գրությունները, հաղորդում է Gazeta-ն։
«Պահերի» ձեւավորմամբ կզբաղվի Twitter-ի հատուկ թիմը՝ այնպիսի գործընկերների մասնակցությամբ, ինչպիսին են Bleacher Report-ը, Buzzfeed-ը, Entertainment Weekly-ն, Fox News-ը, Getty Images-ը, Mashable-ը, MLB-ը, NASA, New York Times-ը, Vogue եւ Washington Post-ը։ Մոտ ժամանակներս Twitter-ի գործընկերների ցուցակը կընդլայնվի։ Այս պահին ծառայությունը մատչելի է ԱՄՆ-ի տարածքում դեսքթոփային տարբերակի համար, ինչպես նաեւ Android եւ iOS համակարգերի, բայց մոտ ժամանակներս ծառայությունը մատչելի կդառնա նաեւ այլ երկրների օգտատերերի համար։
Նոր գործառույթն ավելացել է Twitter-ի համահիմնադիր Ջեկ Դորսիի՝ սոցցանցի նոր ղեկավար նշանակվելուց օրեր անց։