ՀԷՑ-ի նոր սեփականատերը կվերացնի բոլոր անորոշությունները, որոնք կային մինչ այս պահը։ Այս մասին հոկտեմբերի 7-ին կայացած մամուլի ասուլիսի ժամանակ հայտարարել է տնտեսագետ Վարդան Բոստանջյանը։
Նրա խոսքով՝ «Տաշիր» ընկերությունների խումբը, ելնելով Հայաստանի շահերից, իր վրա է վերցրել բարդ խնդրի լուծումը։ «Ըստ էության՝ մենք գիտենք, որ «Հայաստանի էլեկտրացանցեր» ընկերությունը ծայրահեղ վատ վիճակում է գտնվում ինչպես կառավարման, այնպես էլ տեխնիկական հագեցվածության առումով։ Եվ դա անդրադարձել է էլեկտրաէներգիայի բավական բարձր սակագնի վրա։ Ստեղծված իրավիճակից իհարկե ելք էր պետք, ես կասեի՝ փրկություն։ Այդ ելքը «Տաշիր» ընկերությունների խմբի կողմից ՀԷՑ-ը գնելն էր»,- ընդգծեց Բոստանջյանը՝ հավելելով, որ դա հայ ազգի համար մեծ նվեր էր։
Տնտեսագետի վստահեցմամբ՝ ժամանակակից հագեցած եւ արդյունավետ գործող ընկերություն ունենալու համար ներդրումներ են պետք, առնվազն 500 մլն դոլարի չափով։ Հարցին, թե այլ ելք չկար արդյոք, տնտեսագետը պատասխանեց. «Մենք պետք է թույլ տայինք, որ թալանը շարունակվե՞ր»։
Ավելի վաղ NEWS.am-ը հայտնել էր, որ Հայաստանի իշխանությունները ռուսական «Ինտեր ՌԱՕ» ընկերությանը թույլ են տվել «Հայաստանի էլեկտրացանցերը» վաճառել ծագումով հայ ռուսաստանցի գործարար Սամվել Կարապետյանին։ Այդ մասին որոշումն ընդունվել է հոկտեմբերի 1-ին Հայաստանի Հանրային ծառայությունները կարգավորող հանձնաժողովի նիստին՝ «Ինտեր ՌԱՕ Հոլդինգ BV»-ի եւ «Հայաստանի էլեկտրացանցերի» համապատասխանաբար սեպտեմբերի 15-ով եւ 25-ով թվագրված դիմումների հիման վրա։ «Ինտեր ՌԱՕ»-ի եւ «Տաշիր» հոլդինգի միջեւ կնքված պայմանագրի համաձայն, «Հայկական էլեկտրացանցերի» բաժնետոմսերի 100-ը փոխանցվել է «Լիորմանդ Հոլդինգս Լիմիթեդ» ընկերությանը, որը գրանցված է Կիպրոսում։ Գործարքի գումարը չի հրապարակվում։ Հայաստանի կառավարության առջեւ որպես գործարքի երաշխավոր հանդես կգա «Կասկադ էլեկտրացանցեր» ռուսական ընկերությունը։