Թռչունների հին նախնիները բավականին վաղուց են սովորել թռչել՝ առնվազն 125 միլիոն տարի առաջ: Առաջ հետազոտողները վստահ չէին, որ հին թռչունների պարզունակ կառուցվածքը նրանց թույլ էր տալիս օդ բարձրանալ:
Ժամանակակից թռչունների առաջին նախնիները՝ արխեոպթերիքսները, մեր մոլորակի վրա հայտնվել են մոտավորապես 150 մլն տարի առաջ: Դրանք հայտնաբերվել են ժամանակակից Գերմանիայի տարածքում: Արխեոպթերիքսն իր չափերով չէր գերազանցում ագռավին, իսկ մարմնի կառուցվածքով սողուն էր հիշեցնում: Ժամանակակից թռչունների համեմատ՝ նրանց թեւերի պարզունակ կառուցվածքի պատճառով գիտնականները կասկածում էին արխեոպթերիքսի թռչելու ունակությանը, հայտնում է Gazeta-ն:
Հետազոտողները ուսումնասիրել են մոտավորապես 125 մլն տարի ապրող հին թռչունի զարմանալիորեն լավ պահպանված թեւը: Աշխատանքի արդյունքում հնէաբանները հանգել են այն եզրակացության, որ չնայած թռչունի կմախքը տարբերվում է ժամանակակից թռչունի կմախքից, բայցեւայնպես մկանների դիրքն ու ուժը վկայում են թռչելու ունակության մասին: Ընդ որոմ, հետազոտողների կարծիքով, թռչունը դա անում էր նույն ձեւով, ինչ նրա ժամանակակից ազգակիցները:
