Մեծ պատիվ է Արցախի վարչապետից հուշամեդալ ստանալ, որը պարտավորեցնում է ինձ ավելի արդյունավետ աշխատել: Այս մասին այսօր՝ հոկտեմբերի 7-ին, Ստեփանակերտում, Արցախի Հանրապետության վարչապետ Արայիկ Հարությունյանի հետ հանդիպման ժամանակ նշել է ՀՀ աթլետիկայի ֆեդերացիայի նախագահ Ռոբերտ Էմմիյանը: Նրան ուղեկցել է ԼՂՀ աթլետիկայի ֆեդերացիայի նախագահ, ԱԺ պատգամավոր Արթուր Թովմասյանը:
Վարչապետը ողջունել է Ռ. Էմմիյանին եւ շնորհակալություն հայտնել Արցախի աթլետիկայի բնագավառը եւս ուշադրության ներքո պահելու համար: «Մեզ համար միշտ հաճելի է Ձեզ հյուրընկալել՝ որպես թե՛ աթլետիկայի ֆեդերացիայի նախագահ եւ թե՛ անվանի մարզիկ: Ուրախալի է, որ մեր ֆեդերացիաների միջեւ համագործակցությունը պտուղներ է տալիս, եւ Արցախում եւս զարգանում է սպորտի այդ ուղղությունը»,- նշել է վարչապետը:
Ա. Հարությունյանը ՀՀ աթլետիկայի ֆեդերացիայի նախագահին պարգեւատրել է ԱՀ վարչապետի հուշամեդալով՝ ԱՀ ֆիզիկական կուլտուրայի եւ սպորտի բնագավառում ունեցած մեծ ավանդի եւ ցուցաբերած աջակցության համար::
«Շնորհակալ եմ ջերմ ընդունելության եւ բարձր գնահատականի համար: Ուրախալի է տեսնել, որ անձամբ Դուք խրախուսում եք սպորտի զարգացումն Արցախում»,- ասել է Ռոբերտ Էմմիյանը:
Ֆեդերացիայի նախագահը վարչապետին է հանձնել հոկտեմբերի 3-ին Երեւանում տեղի ունեցած կիսամարաթոնի մեդալներից եւ հուշանվերներից՝ հույս հայտնելով, որ Արցախում եւս նմանատիպ զանգվածային միջոցառումներ կկազմակերպվեն: