Հայաստանի ազգային հավաքականն ընտրության մեծ հնարավորություն չունի: Այդ մասին Նիս քաղաքի «Ալյանս Ռիվյերա» ստադիոնում հոկտեմբերի 8-ին կայանալիք Ֆրանսիա - Հայաստան ընկերական հանդիպման նախախաղային ասուլիսում հայտնեց Հայաստանի ազգային հավաքականի գլխավոր մարզչի պաշտոնակատար Սարգիս Հովսեփյանը։
«Ֆրանսիայի հետ պետք է կարգապահ ֆուտբոլ խաղանք 90 րոպե, եթե այդպես չխաղանք, մեզ կպատժեն: Ես դա ասել եմ նաեւ տղաներին: Հայաստանի ազգային հավաքականն ընտրության մեծ հնարավորություն չունի: Մենք ավելի շատ աշխատել ենք փոփոխել մարտավարությունը: Տղաներին վստահություն ենք ներշնչել, որպեսզի իրենք հավատան իրենց: Ես տեսնում եմ այդ բերքերը, որ տալիս է մեր աշխատանքը: Դանիայի խաղից հետո մենք վստահություն ձեռք բերեցինք: Այդ խաղում կարող էինք նաեւ հաղթել: Շատ կարեւոր է, որ հավատանք այն գործին, որն անում ենք: Ֆրանսիայի հետ երեւանյան խաղից հետո քիչ փոփոխություններ ենք արել»,- նշել է մարզիչը:
Հովսեփյանը պատմել է, թե ազգային հավաքական ֆուտբոլիստներ հրավիրելու հարցը քննարկում են թիմի մարզիչների հետ. «Վերջնական որոշումը ես եմ կայացնում: Ցանկացած ֆուտբոլիստի, որ հրավիրում եմ հավաքական, դժգոհություններ է առաջացնում: Ես դրան ուշադրություն չեմ դարձնում: Մեկը մեկին է հավանում, մյուսը՝ մյուսին: Ես վստահ եմ իմ սկզբունքների ու իմ կարծիքի վրա: Դրա համար բոլոր խոսակցություններին հրավիրվող ֆուտբոլիստների մասին ուշադրություն չեմ դարձնում»,- նշել է Հովսեփյանը:
Մարզիչը նաեւ խոսել է Գեղամ Կադիմյանի մասին. «Նա լավ ֆուբոլիստ է: Այժմ ժամանակ չկա նրան հրավիրելու համար, բայց Գեղամն իր համաձայնությունը տվել է խաղալ ազգային հավաքականում: Նրան կհրավիրենք ընկերական խաղի եւ կտեսնենք, թե ինչ հնարավորություններ ունի ազգային հավաքականում խաղալու համար: Ինչ վերաբերում է այն հարցին, որ ես հիմնականում «Փյունիկի» ֆուտբոլիստներին եմ հրավիրում հավաքական, ասեմ, որ շատ կցանկանայի, այլ թիմերի ֆուտբոլիստներ եւս լինեին: Մարզիչն ընտրում է ուժեղագույներին: Լավ կլիներ, եթե ես գնայի այլ ակումբներում տեսնեի լավ ֆուտբոլիստների, բայց այնտեղ հիմնականում լեգեոնականներ են: Եթե նայեք աղյուսակին, ապա ամենաշատ խփած ու քիչ բաց թողած գոլերն ունի հենց «Փյունիկը»: Դա արդեն խոսում է «Փյունիկի» մակարդակի մասին:
Ռումյան Հովսեփյանի մասին կասեմ, որ նա շատ լավ ֆուտբոլիստ է, բայց ինձ հենակետային դիրքում պետք է այլ խաղացող, որը կարող է ավելի շատ պաշտպանվել եւ քանդել մրցակցի գրոհները, քան գրոհել: Ցավոք, հիմա Ռումյանն այդ խնդիրները չի կարող լուծել: Կարծում եմ՝ այն ֆուտբոլիստները, որոնց հրավիրել եմ, նրանք կարող են լուծել իմ պահանջները, իսկ եթե ոչ, ապա Ռումյանին եւ մյուսներին հնարավորություն կտրվի առաջիկայում: Բայց այս պահի համար կարծում եմ, որ թիմին անրաժեշտ են այն ֆուտբոլիստները, ում հրավիրել եմ»,- ասել է Հովսեփյանը:
Հարցին, թե ցանկանում է շարունակել գլխավորել հավաքականը, մարզիչը պատասխանել է. «Ես չեմ ցանկանա ինձ գնահատական տալ: Դա կտա ֆեդերացիայի նախագահը: Ես միայն անում եմ այն, ինչը կարող է օգնել ազգային հավաքականին: Եթե ես հիմա իմ աշխատանքի գնահատականը տամ, դա սխալ կընդունվի: Քիչ ժամանակ է մնացել: Շուտով պարզ կլինի իմ աշխատանքի գնահատականը ֆեդերացիայի կողմից»,- ամփոփել է մարզիչը:
Վերա Մարտիրոսյան՝ Նիսից
