Առնվազն 35 տոննա նավթ է լցվել Հյուսիսային ծով այսօր առավոտյան «Ստատֆյորդ» նավթի հանքում տեղի ունեցած միջադեպի արդյունքում, որի օպերատորը նորվեգական Statoil ASA նավթագազային կոնցեռնն է: Այս մասին ասված է ընկերության տարածած հաղորդագրությունում:
Դրա համաձայն, ջրի մեջ նավթի հոսքը նկատել են տեղական ժամանակով առավոտյան 08:30-ին, նավթը Hilda Knutsen բեռնանավ փոխադրելիս: Բեռնումն անմիջապես դադարեցրել են, խողովակները՝ փակել:
Ըստ ՏԱՍՍ-ի, Statoil-ում նշել են, որ միջադեպի պատճառ է դարձել նավթամուղ փողրակի խոտանը: Իրադրության զարգացմանը հետեւում են հերթապահ նավն ու փրկարար ինքնաթիռը: Իշխանությունները տեղեկացվել են միջադեպի մասին:
Նորվեգական հնագույն Statfjord նավթագազային հանքը բացահայտել են 1974 թվականին, իսկ արդյունահանումն այստեղ սկսվել է 1979-ին: Ներկայում այստեղ օրական 20-25 հազար բարել նավթ է արդյունահանվում: Նախկին նավթի արտահոսք տեղի է ունեցել նաեւ 2007 եւ 2008 թվականներին:
