Պատգամավոր Էլինար Վարդանյանին «Բարգավաճ Հայաստան» կուսակցությունից հեռացնելու որոշում կայացնելու պատճառը սահմանադրական բարեփոխումների վերաբերյալ նրա դիրքորոշումը չէր: Այս մասին այսօր՝ հոկտեմբերի 9-ին, խորհրդարանական ճեպազրույցներում հայտնել է ԲՀԿ խմբակցության քարտուղար Վահե Էնֆիաջյանը:
Նրա խոսքով, Երեւանի Կենտրոն շրջանի՝ կուսակցության տարածքային մարմինը նման որոշում է կայացրել, Վարդանյանի պասիվության պատճառով, քանի որ նա չէր մասնակցում կուսակցական աշխատանքներին: Բացի դրանից Վարդանյանը խախտել էր խորհրդարանական խմբակցությունում հարաբերությունների էթիկան ՝ Հայաստանից մեկնելով կարեւորագույն քվեարկությունից մի քանի օր առաջ ու այդ մասին չտեղեկացնելով ոչ ղեկավարությանը, ոչ քարտուղարին, հավելել է Էնֆիաջյանը:
«Խնդրում եմ ինձ ճիշտ հասկանալ. մի բան է եթե մեր խմբակցության պատգամավորը գալիս է ու քվեարկում է ոչ այնպես,, ինչպես խմբակցությունն է որոշել, օրինակ Տիգրան Ուրիխանյանի նման: Մեկ այլ բան է, երբ Վարդանյանը, որը սոցցանցերում ու մամուլում բավականին ակտիվ է, չգիտես ինչու որպես պատգամավոր իր դիրքորոշումը չի հայտնում»,- ասել է Էնֆիաջյանը:
Նշենք, որ հոկտեմբերի 5-ին սահմանադրական բարեփոխումների վերաբերյալ քվեարկությանը Էլինար Վարդանյանը ներկա չէր: Ավելի վաղ նա հայտարարել էր, որ դեմ է դրանց (մինչդեռ խմբակցությունը «կողմ» էր արտահայտվել):
Էլինար Վարդանյանին ԲՀԿ-ից հեռացնելու որոշումն ուղարկվել է ԲՀԿ քաղխորհուրդ, որի հաստատումից հետո միայն նա կհամարվի հեռացված:
