Հայաստանը Եվրամիության հետ համագործակցության զարգացման իրավական նոր բազայի նախապատրաստության գործընթացում կարող է հույս դնել Ֆրանսիայի աջակցության վրա։ Այս մասին Երեւանում հոկտեմբերի 9-ին՝ ՀՀ արտգործնախարար Էդվարդ Նալբանդյանի հետ համատեղ ճեպազրույցի ժամանակ, հայտնել է Ֆրանսիայի՝ եվրոպական հարցերով պետնախարար Արլեմ Դեզիրը։
Ֆրանկոֆոնիայի 31-րդ նախարարական համաժողովի ընդունելության համար շնորհակալություն հայտնելով իր հայ գործընկերոջը՝ Արլեմ Դեզիրը նշել է, որ դա միջազգային մասշտաբի կարեւոր իրադարձություն է։ Դրա հետ մեկտեղ այն հայ-ֆրանսիական երկկողմ հարաբերությունները քննարկելու հնարավորություն է։ Երեւան կատարած այցի շրջանակներում Արլեմ Դեզիրը արդեն հանդիպել է փոխվարչապետի հետ, իսկ վաղը նրան կընդունի ՀՀ նախագահ Սերժ Սարգսյանը։
Հյուրի գնահատմամբ՝ երկու երկրների հարաբերությունները բացառիկ բնույթ են կրում, ինչի մասին են վկայում երկու երկրների նախագահների հաճախակի հանդիպումները։
Օրակարգի կարեւոր մաս է Հայաստանի եւ ԵՄ-ի համագործակցությունը։ Այդ ենթատեքստում Արլեմ Դեզիրը նշել է, որ եկող շաբաթ Լյուքսեմբուրգում կհաստատվի Հայաստանի հետ բանակցություններ սկսելու մանդատը, որից հետո կսկսվի նոր իրավական բազայի նախապատրաստումը։ Այս կապակցությամբ Դեզիրն ընդգծել է, որ ֆրանսիական կողմը ըմբռնումով է մոտենում Հայաստանի՝ ԵՏՄ-ին անդամակցելու որոշմանը։ «Հայաստանը կարող է ակնկալել Ֆրանսիայի աջակցությունը»,- վստահեցրել է Արլեմ Դեզիրը։
