«Նոյեմբերի 5-ի» գործով դատավարության առաջին նիստի օրը դատարանի բակում օդամղիչ ատրճանակով ոստիկանների ուղղությամբ կրակելու ու նրանցից մի քանիսին վիրավորելու համար 9 տարվա ազատազրկման դատապարտված Հայկ Կյուրեղյանի հարազատները կբողոքարկեն առաջին ատյանի դատավճիռը: Այս մասին NEWS.am-ի հետ զրույցում ասաց Հայկ Կյուրեղյանի հայրը՝ Արմենակ Կյուրեղյանը:
«Բազմիցս ասել եմ, որ Հայկի դատավճիռն անհամաչափ է, այն չի համապատասխանում Հայկի կողմից քաղաքացիական անհնազանդության արարքին, եւ դա քաղաքական հաշվեհարդար է նրա նկատմամբ»,-ասաց Արմենակ Կյուրեղյանը:
Նա նշեց, որ Վերաքննիչ դատարանից առանձնապես հույսեր չունեն, սակայն Հայկը ցանկություն է հայտնել, որ առաջին ատյանի որոշումը անպայման բողոքարկվի Վերաքննիչ, ապա նաեւ Վճռաբեկ դատարաններում:
Ավելի վաղ տեղեկացրել էինք, որ 2014թ. հունիսի 12-ին` Շանթ Հարությունյանի եւ ընկերների, այսպես կոչված, «Նոյեմբերի 5-ի» գործով դատավարության առաջին նիստի օրը, դատարանի բակում օդամղիչ ատրճանակով ոստիկանների ուղղությամբ կրակելու ու նրանցից մի քանիսին վիրավորելու համար Հայկ Կյուրեղյանը սեպտեմբերի 15-ին դատապարտվեց 9 տարվա ազատազրկման:
