Եվրոպական լիբերալ դեմոկրատական եւ բարեփոխումների կուսակցությունը կոչ է արել ՀՀ իշխանություններին «անհապաղ ազատ արձակել բոլոր քաղբանտարկյալներին»:
Այս մասին նշված է Կուսակցության նախագահ Էննեմի Նեյթս-Յութերբրոքի հայտարարության մեջ, որը տեղադրած է Եվրոպական լիբերալ դեմոկրատական եւ բարեփոխումների կուսակցության պաշտոնական կայքէջում:
Հայտարարության մեջ մասնավորապես ասվում է. «Հայաստանը, լինելով Եվրախորհրդի անդամ երկիր, պետք է անհապաղ ազատ արձակի բոլոր քաղբանտարկյալներին, քանի որ խոսքի ազատությունը եւ համոզմունքների ազատությունը Եվրախորհրդի հիմնարար արժեքներից են: Քաղաքական դրդապատճառներով մարդկանց բանտում պահելը եւ նրանց արդար դատաքննության իրավունքից զրկելը հակասում է Եվրախորհրդի անդամ երկրների հիմնարար պարտականություններին եւ անկասկած կարող է խոչընդոտել Հայաստանի եւ Եվրամիության մերձեցման գործընթացը»:
Հիշեցնենք, որ ընդդիմադիր Հայոց համազգային շարժումը այս տարվա մարտից անդամակցում է Եվրոպական լիբերալ դեմոկրատական եւ բարեփոխումների կուսակցությանը: Հենց ՀՀՇ-ն էլ քաղբանտարկյալների խնդրով դիմել է Եվրոպական լիբերալ դեմոկրատական եւ բարեփոխումների կուսակցությանը:
Այս առնչությամբ, ՀՀՇ վարչության նախագահ Արամ Մանուկյանը «Ազատություն» ռադիոկայանին ասել է. «Մենք գրել ենք, որ եթե դուք ցանկանում եք, որ հայ հասարակությունը հավատա եվրոպական արժեքներին եւ ժողովրդավարության արժեքներին, ապա ձեր գործունեությամբ չպետք է հայ հասարակությանը հիասթափության մատնեք: Մենք եվրոպական երկրների շարքում ենք եւ պարտավոր ենք ապրել եվրոպական երկրների արժեքներով: Այսինքն` ինչքան դա մեր խնդիրն է, նույնքան էլ եվրոպական կառույցների խնդիրն է»:
Հիշեցնենք, որ ներկայումս Հայաստանում անազատության մեջ են գտնվում 14 քաղբանտարկյալներ:
