Լատվիան անվերապահորեն սատարում է ԵԱՀԿ Մինսկի խմբի համանախագահների ջանքերը: Այդ մասին ասել է Լատվիայի արտաքին գործերի նախարար Էդգարս Ռինկեւիչը՝ Ֆրանկոֆոնիայի միջազգային կազմակերպության անդամ երկրների արտգործնախարարների 31-րդ համաժողովի շրջանակներում հանդիպելով արտգործնախարար Էդվարդ Նալբանդյանին:
ԱԳՆ մամուլի ծառայությունից NEWS.am-ին հայտնում են, թե, ողջունելով հյուրին` նախարար Նալբանդյանը կարեւորեց երկկողմ փոխգործակցության համակողմանի զարգացմանը նպաստող Հայաստանի եւ Լատվիայի միջեւ պարբերական քաղաքական երկխոսությունը։
Շնորհակալություն հայտնելով ջերմ ընդունելության եւ Ֆրանկոֆոնիայի նախարարական համաժողովը բարձր մակարդակով կազմակերպելու համար՝ նախարար Ռինկեւիչը խորհրդանշական համարեց, որ հենց Երեւանում է առաջին անգամ Լատվիայի ԱԳ նախարարը մասնակցում ՖՄԿ արտգործնախարարների համաժողովին։
Զրուցակիցները գոհունակությամբ արձանագրեցին, որ Հայաստանի եւ Լատվիայի միջեւ հարաբերությունները դինամիկ զարգանում են, եւ քննարկեցին բարձր մակարդակի փոխայցելությունների կազմակերպման, միջազգային կազմակերպությունների շրջանակներում համագործակցության, առեւտրատնտեսական փոխգործակցության խթանման հարցերը։
Նախարարները մտքեր փոխանակեցին Արեւելյան գործընկերության Ռիգայի գագաթաժողովի արդյունքների վերաբերյալ։ Այս համատեսքստում Լատվիայի արտգործնախարարը շնորհակալություն հայտնեց գագաթաժողովին Հայաստանի կառուցողական մասնակցության համար։
Զրույցի ընթացքում նախարարներ Նալբանդյանն ու Ռինկեւիչը անդրադարձան Եվրոպական միության եւ Եվրասիական միության միջեւ փոխգործակցության հաստատման հնարավորություններին։
Հայաստանի արտգործնախարարը ներկայացրեց Լեռնային Ղարաբաղի հիմնախնդրի կարգավորման ուղղությամբ Հայաստանի եւ ԵԱՀԿ Մինսկի խմբի համանախագահների ջանքերը, Ադրբեջանի սադրանքների հետեւանքով ղարաբաղյան հակամարտության գոտում ստեղծված լարված իրավիճակը։ Այս առումով Էդգարս Ռինկեւիչը ընգծեց, որ Լատվիան անվերապահորեն սատարում է ԵԱՀԿ Մինսկի խմբի համանախագահների ջանքերը եւ նրանց կողմից ներկայացված առաջարկությունները։
Հանդիպման օրակարգում էին Մերձավոր Արեւելքում տեղի ուենցող զարգացումները, միգրացիոն հոսքերը եւ այդ մարտահրավերների լուծման ուղղությամբ գործադրվող ջանքերը։