Հայ համայնքի դերակատարումը մեծ է Քվեբեկի քաղաքական, հասարակական, մշակութային եւ տնտեսական կյանքում: Այդ մասին ասել է Քվեբեկի Միջազգային զարգացման եւ Ֆրանկոֆոնիայի հարցերով նախարար Քրիստին Սան Պիեռը, որը հոկտեմբերի 10-ին հանդիպել է Հայաստանի արտգործնախարար Էդվարդ Նալբանդյանին:

ԱԳՆ մամուլի ծառայությունից հայտնում են, թե ողջունելով հյուրին` Էդվարդ Նալբանդյանը նշեց, որ ուրախ է Երեւանում ողջունել Քվեբեկի բարձրաստիճան պատվիրակությանը եւ գոհունակությամբ ընդգծեց, որ Քվեբեկը ակտիվորեն մասնակցում է Ֆրանկոֆոնիայի տարբեր կառույցների աշխատանքներում։ Նախարարը ջերմությամբ վերհիշեց, որ 7 տարի առաջ՝ 2008թ. հոկտեմբերի 18-ին, հենց Քվեբեկում տեղի ունեցած Ֆրանկոֆոնիայի միջազգային կազմակերպության 24-րդ գագաթաժողովի ընթացքում Հայաստանին ասոցացված անդամի կարգավիճակ շնորհելու մասին որոշում ընդունվեց:

Շնորհակալություն հայտնելով ընդունելության համար՝ Քրիստին Սան Պիեռը բարձր գնահատեց այն ակտիվությունն ու նախաձեռնողականությունը, որը ցուցաբերել է Հայաստանը Քվեբեկի գագաթաժողովից մինչ օրս, եւ կարճ ժամակահատվածում դառնալով Կազմակերպության լիիրավ անդամ, այսօր հյուրընկալել է այդքան կարեւոր եւ պատասխանատու միջոցառում՝ արտգործնախարարների համաժողովը:

Հանդիպման ընթացքում կողմերը քննարկեցին Ֆրանկոֆոնիայի արտգործնախարարների հանդիպման օրակարգին վերաբերող հարցերի լայն շրջանակ:

Նախարար Սան Պիեռը բարձր գնահատեց հայ համայնքի դերակատարումը Քվեբեկի քաղաքական, հասարակական, մշակութային եւ տնտեսական կյանքում։

Նախարար Նալբանդյանը շնորհակալություն հայտնեց Հայոց ցեղասպանության ճանաչման հարցում Քվեբեկի սկզբունքային դիրքորոշման համար։ Քրիստին Սան Պիեռը ներկայացրեց Կանադայում եւ Քվեբեկում Հայոց ցեղասպանության 100-րդ տարելիցի կապակցությամբ կազմակերպված միջոցառումները։