Սիրիայի Բանակի եւ Զինված ուժերի գլխավոր հրամանատարությունը հայտնել է, որ համընդհանուր հարձակողական գործողության արդյունքում լիակատար հսկողության տակ են վերցվել Հալեպի Ազատ գոտին եւ 13 բնակավայր Համայի եւ Լաթաքիայի նահանգներում։
Համա նահանգի հյուսիսում ցամաքային բոլոր ուժերի մասնակցությամբ ահաբեկչական խմբավորումների դեմ պայքարում բոլոր ուղղություններով զգալի հաջողություններ են արձանագրվել, նշվում է Գերագույն հրամանատարության հայտարարության մեջ, որը մեջբերում է սիրիական պետական տեղեկատվական ՍԱՆԱ գործակալությունը։
Համայի հյուսիսում Զինված ուժերը վերահսկողության տակ են առել Քաֆր-Նաբուդա, Ատշան, Քաբիբատ, Մաարքաբա, Ատ-Տամանա, Ումմ-Հարթեն, Սքեյք, Տել-Սքեյք, Թել Աս-Սահր եւ Ալ-Բահսա բնակավայրերը։
Մարտերի ընթացքում ոչնչացվել են մեծ թվով գրոհայիններ, ջարդվել են զրահապատ մեքենաներ, ռազմամթերքի պահեստներ, ոչնչացվել է 5 ավտոմեքենա՝ զինված խոշոր տրամաչափի հրանոթներով եւ ամերիկյան արտադրության երեք TOW հակատանկային հրթիռ։ Լաթաքիա նահանգի հյուսիսում բանակը լիակատար վերահսկողության տակ է առել Ջուբ Ալ-Ահմար, Քաֆր-Դելբա, Թելալ Քեթֆ, Ջուրաթ Ալ-Բատիխ եւ Ռուվեյսեթ Հանդակ Ջամու շրջանները։
«Զինված ուժերի ցամաքային գործողության հաջողությունը, որոնք ահաբեկչական խմբավորման շարքերին մեծ վնասներ են պատճառել, հզոր ազդեցություն է թողել ահաբեկիչների վրա, որոնք ամբողջությամբ բարոյալքված են եւ մեծ խմբավորումներով խուճապահար փախչում են Թուրքիա՝ թողնելով զենքն ու ռազմական տեխնիկան։ ՌՈՒ գլխավոր հրամանատարությունն ընդգծում է ահաբեկչությունը վճռականորեն եւ պլանաչափ կերպով ոչնչացնելու պատրաստ զինվորների բարձր ռազմական ոգին իրենց հայրենասիրական առաքելությունը կատարելիս», - ասվում է հայտարարության մեջ։
