Հայաստանում տեղեկատվական տեխնոլոգիների ոլորտ են գրոհում աղջիկները։
Հայաստանի ազգային պոլիտեխնիկական համալսարանի ուսանողուհի Էլեն Ասատրյանը, որը հոկտեմբերի 12-ին նախագահ Սերժ Սարգսյանից ստացավ ՏՏ ոլորտի «Լավագույն մագիստրոսի» 2-րդ աստիճանի պարգեւը, NEWS.am-ի հետ զրույցում ասաց, որ սխալ է այն կարծիքը, թե ՏՏ ոլորտը տղաների մենաշնորհն է։
«Ընդհանրապես համաձայն չեմ, որ ՏՏ ոլորտը աղջիկներինը չէ։ Իմ շրջապատում շատ աղջիկներ կան, բոլորը ՏՏ ոլորտից ու շատ կայացած են, շատ դեպքերում ավելի խելացի են ու կայացած, քան տղաները։ Ինձ թվում է` աղջիկներն արդեն գրոհում են ՏՏ ոլորտը եւ ավելի շատ են»,-ասաց Էլեն Ասատրյանը։
Էլենի խոսքով՝ Հայաստանում աղջիկներն արդեն գիտակցում են, որ իրենց բարեկեցությունը ապահովելու համար ոչ թե պետք է ամուսնանալ, այլ լավ վարձատրվող աշխատանք ունենալ, ինչը հնարավոր է ՏՏ ոլորտում։
«Հայաստանում այն կարծիքի են, թե աղջիկը պետք է ընտանիք կազմի եւ ընտանիք պահի, իսկ աշխատանքն ու ավելի խելքի բաները տղամարդկանցն է, ինչն իրականում այնքան էլ ճիշտ չէ։ Աղջիկներն էլ են ուզում գումար աշխատել, այդ պատճառով շատերը ձգտում են ՏՏ ոլորտում հաստատվել եւ ավելի բարեկեցիկ կյանք իրենց ապահովել»,- նշեց Էլենը, որն արդեն 2 տարի է՝ աշխատում է ՏՏ ոլորտում։
NEWS.am-ի հետ զրույցում «Մխիթար Սեբաստացի» կրթահամալիրում սովորող եւ նախագահի կողմից «Լավագույն աշակերտ» պարգեւին արժանացած Մերի Թելունցը եւս չհամաձայնեց այն տարածված կարծիքի հետ, թե ՏՏ ոլորտն աղջիկները չէ։
«Եթե անձը հետաքրքրված է ոլորտով, կարծում եմ՝ սեռն էական չէ։ Պետք չէ թերագնահատել մեր աղջիկներին»,-ասաց Մերի Թալունցը։
Նշենք, որ ՏՏ ոլորտում ՀՀ նախագահի 2015թ. կրթական պարգեւներին արժանացած ուսանողների եւ աշակերտների 30 տոկոսն աղջիկներ են։