Չափազանց կարեւոր է հակամարտող կողմերի հասարակություններին համոզել, որ լուծման միակ ճանապարհը խաղաղությունն է։ Այդ մասին ասել  է Իտալիայի նախկին արտգործնախարար, Իտալիայի Միջազգային հարաբերությունների ընկերակցութան նախագահ Ֆրանկո Ֆրատինին  dailykarabakh թերթին տված հարցազրույցում, տեղեկացնում է haqqin.az-ը։

Նախկին նախարարի կարծիքով,  առանց տարածաշրջանային ուժերի աջակցության, Լեռնային Ղարաբաղի հակամարտության կարգավորման գործում որեւէ առաջընթաց արձանագրելն անիրական է։ Ֆրանկո Ֆրատինին կարծում է, որ այդ հարցում ակտիվ պիտի լինեն տարածաշրջանի հիմնական խաղացողները՝ Թուրքիան, ԱՄՆ-ն, ԵՄ-ն եւ Ռուսաստանը․ «Միայն նրանց օգնությամբ եւ ակտիվ աջակցությամբ է հնարավոր թույլ չտալ, որ Կովկասը երկրորդ անգամ վերածվի  հակամարտության ակտիվ գոտու»։

Իտալիայի արտաքին գործերի նախկին նախարարը համարում է, որ Լեռնային Ղարաբաղի հակամարտությունը պիտի գերակայություն լինի  Բրյուսելի գործունեության մեջ։  Նրա կարծիքով, արդեն բավականին ժամանակ է անցել հրադադարի ռեժիմի վերաբերյալ համաձայնագրի ստորագրումից հետո, բայց այդ համաձայնագիրը դեռեւս իրական խաղաղության եւ կայունության չի հանգեցրել եւ հակամարտությունը շարունակվում է։ 

Իտալացի դիվանագետը նշել է, որ մյուս կողմից շատ դժվար է պատկերացնել Լեռնային Ղարաբաղի հակամարտության լուծումը, առանց երկխոսության եւ հաշտեցնման ռազմավարության․  «Չափազանց կարեւոր է հակամարտող երկրների հասարակություններին համոզել, որ միակ ուղին խաղաղությունն է։ Հակառակ դեպքում հակամարտության կարգավորմանն ուղղված միջազգային ջանքերն օգուտ չեն տա, որքան էլ լավը լինի սցենարը»։