ՌԴ Թմրանյութերի շրջանառության վերահսկողության դաշնային ծառայության ղեկավար Վիկտոր Իվանովը եռօրյա այցով Հայաստան է եկել ՀԱՊԿ պայմանագրի շրջանակում թմրանյութերի դեմ պայքարը քննարկելու համար։
ՀԱՊԿ անդամ երկրների` Թմրանյութերի անօրինական շրջանառության դեմ պայքարի իրավասու մարմինների կոորդինացիոն խորհրդի տասնյոթերորդ նիստին, որն ընթանալու է Վիկտոր Իվանովի նախագահությամբ, նախատեսված է քննարկել 2015թ. երկրորդ կիսամյակում խորհրդի աշխատանքները, ինչպես նաեւ Աֆղաստանից եկող համաշխարհային թմրասպառնալիքի դեմ համագործակցության հարցեր, տեղեկացնում է «ՌԻԱ Նովոստին»։
Կքննարկվի նաեւ 2016թ. ՄԱԿ-ի Գլխավոր ասամբլեայի` թմրանյութերի խնդրին նվիրված հատուկ նիստին ընդառաջ ՀԱՊԿ անդամ երկրների` թմրանյութերի դեմ պայքարի ստորաբաժանումներում ներգրավված ոստիկանների կողմից ընդհանուր դիրքորոշում մշակելու առաջարկը։
Նիստի օրակարգում ներառված են նաեւ Թմրանյութերի անօրինական շրջանառության դեմ պայքարի իրավասու մարմինների կոորդինացիոն խորհրդի քարտուղարի ընտրության, ՀԱՊԿ հակաթմրանյութային գործողությունների կենտրոնի ստեղծման եւ այլ հարցեր։
