Հայաստանը ցանկանում է երկաթուղային հաղորդակցություն ունենալ Իրանի հետ, այստեղ բավականին աշխատանք կատարված է, եւ մեր երկրի համար այս չափազանց կարեւոր ծրագիրն իրականացնելու ենք: Այսօր՝ օգոստոսի 31-ին միջազգային օլիմպիադաների մրցանակակիրների ու մեդալակիրների հետ հանդիպման ժամանակ նշել է ՀՀ նախագահ Սերժ Սարգսյանը:
Տրանսպորտային հեռահաղորդակցության ոլորտում նոր ծրագրերով հետաքրքրվող ուսանողի հարցին ի պատասխան Սերժ Սարգսյանն ասել է. «Տրանսպորտային համակարգը երկրի զարկերակն է, արյունատար երակները, առանց որոնց հնարավոր չէ ժամանակակից աշխարհում ապրել. աշխարհը փոքրանում է նաեւ շնորհիվ զարգացած տրանսպորտային համակարգի: Եթե կոնկրետ ծրագրերի մասին է խոսքը, ապա, այո, Հայաստանի տրանսպորտային համակարգը զարգացնելու որոշակի ծրագիր ունենք:
Վստահ եմ` մինչեւ մասնագիտություն ձեռք բերես, մենք արդեն ունենալու ենք նաեւ հաղորդակցման լուրջ ուղիներ մեր հարեւանների հետ: Հիմա ցանկանում ենք, որպեսզի հյուսիս-հարավ ճանապարհ կառուցվի: Ինչ վերաբերում է տրանսպորտը ժամանակակից չափանիշներին համապատասխանեցնելուն` այդ ծրագիրն արդեն սկսել ենք իրականացնել եւ, ամենայն հավանականությամբ, գարնանն արդեն կսկսվեն աշխատանքները: Միջոցները կան, նախագծերն արվում են: Եթե չեմ սխալվում, նույնիսկ արդեն մրցույթ է հայտարարվել, կամ մոտ ժամանակներս կհայտարարվի»: