Ադրբեջանական կողմը մինչեւ յոթ զոհ ու վիրավոր է տվել՝ հայերի կողմից ադրբեջանական գրոհը հետ մղելու եւ հարկադիր նահանջի ժամանակ: Այս մասին NEWS.am-ի թղթակցի հետ զրույցում ասաց ԼՂՀ ՊԲ մամուլի խոսնակ Սենոր Հասրաթյանը՝ անդրադառնալով օգոստոսի 31-ի լուսաբացին ղարաբաղա-ադրբեջանական շփման գոտում ադրբեջանական կողմի իրականացրած դիվերսիոն գործողությանը:
Նա նշեց, որ հայտնի են դարձել զոհերից երկուսի անունները՝ Վուգար Ամիրալի օղլու Ամիրով եւ Պերվին Նաբի օղլու Աբդուլլայեւ ( երկուսն էլ ծնվել են 1991 թվականին): Սենոր Հասրաթյանը հավելեց նաեւ, որ միջադեպի մանրամասները ճշտվում են եւ առաջիկայում տեղի ունեցածի վերաբերյալ լրացուցիչ տեղեկատվություն կհաղորդվի: Ինչ վերաբերում է ադրբեջանական լրատվամիջոցների այն հրապարակումներին, ըստ որոնց, հայկական կողմը երեք զոհ եւ վիրավոր է տվել, ապա դրանք չեն համապատասխանում իրականությանը: Ադրբեջանական դիվերսիոն խմբի գործողությունների հետեւանքով հայկական կողմը, բարեբախտաբար, զոհեր չի տվել, հրազենային վնասվածք է ստացել մեկ մարդ՝ ԼՂՀ պաշտպանության բանակի շարքային զինծառայող Ռուդիկ Մանասերյանը: Նա այժմ գտնվում է Ստեփանակերտի հոսպիտալում: Նրա վիճակն, ըստ Սենոր Հասրաթյանի, բավարար է:
Հիշեցնենք, որ օգոստոսի 31-ի լուսաբացին, մոտավորապես ժամը 6:30-ի սահմաններում ղարաբաղա-ադրբեջանական զորքերի շփման գոտու հյուսիս-արեւելյան ուղղությամբ (Վերին Չայլու գյուղի շրջանում) տեղակայված հայկական դիրքերից մեկի վրա հակառակորդի կողմից ձեռնարկվել է դիվերսիոն գործողության փորձ: Հայ դիրքապահները, ժամանակին հավաստանշելով թշնամու հատուկ նշանակության ջոկատայինների առաջխաղացումը, առանց վարանելու դիմել են համապատասխան քայլերի եւ, հակառակորդին պատճառելով կորուստներ, հետ են շպրտել իր ելման դիրքերը: