Իրան-ԵՏՄ համագործակցությունը կընթանա 2 ուղղություններով՝ բուն Իրան-ԵՏՄ համագործակցությունը եւ Իրանի եւ Չինաստանի մասնակցությունը Մետաքսի ճանապարհի տնտեսական, տրանսպորտային, ֆինանսական եւ առեւտրային ծրագրերին։ Այս մասին նոյեմբերի 11-ին՝ «Ռուս-իրանական համագործակցության ազդեցությունը հարավկովկասյան տարածաշրջանի վրա» թեմայով քննարկման ժամանակ ասել է իրանագետ, «Նորավանք» գիտակրթական հիմնադրամի փորձագետ Սեւակ Սարուխանյանը։
Նրա խոսքով՝ ԵՏՄ-ի եւ Իրանի միջեւ ազատ առեւտրի գոտու ստեղծումը մոտ հեռանկար չէ, քանի որ Իրանն իր շուկայի հովանավորչական արտադրության վրա կենտրոնացած երկիր է։ «Բայց իրավիճակը փոխվում է։ Իրանի էկոնոմիկայի նախարարությունում հատուկ խումբ է ստեղծվել, որն այսօր արդեն ակտիվ զբաղվում է Իրանի եւ Առեւտրի համաշխարհային կազմակերպության միջեւ համապատասխան համաձայնագրի շուրջ բանակցությունների նախապատրաստմամբ։
Իրանը կգնա սեփական տնտեսական եւ առեւտրային համակարգի ազատականացման ճանապարհով։ Իրանն ու ԵՏՄ-ն պոտենցիալ գործընկերներ են ոչ միայն ռուս-իրանական հարաբերությունների պատճառով, այլ նաեւ այն պատճառով, որ Իրանը ԵՏՄ մյուս անդամների, մասնավորապես Ղազախստանի համար կարեւոր տնտեսական գործընկեր է։ Իրան-ԵՏՄ համագործակցության հնարավորությունները ավելի լայն են, քան Թուրքիա-ԵՏՄ համագործակցության հնարավորությունը, եթե հաշվի ենք առնում այն, որ Անկարան մոտ ժամանակներս մաքսային համաձայնագիր կստորագրի Եվրամիության հետ»,- հավելեց մասնագետը։
