Մետաքսի ճանապարհի նախագծի իրականացման մեջ շատ կարեւոր է հարմարավետությունը։ Մենք չենք ստիպում որեւէ երկրի միանալ այդ նախագծին։ Այս մասին նոյեմբերի 20-ին «21-րդ դարի մետաքսի ճանապարհը. Հեռանկարներ եւ համագործակցություն» համաժողովի շրջանակներում լրագրողներին ասել է Հայաստանում ՉԺՀ դեսպանատան խորհրդական Լո Շիսյունը։
Նրա խոսքով՝ այսօրվա համաժողովը շատ լավ պլատֆորմ է Մետաքսի ճանապարհի տնտեսական գոտու համատեղ շինարարության շուրջ կարծիքներ փոխանակելու համար։ «Հայաստանն ու Չինաստանը լավ հարաբերություններ ունեն, պահպանվում է քաղաքական վստահության բարձր մակարդակը, զարգանում են հումանիտար, առեւտրա-տնտեսական հարաբերությունները։ Ինչ վերաբերում է Մետաքսի ճանապարհին, մենք պատրաստ ենք քննարկել եւ որոշումներ կայացնել մեր հայ գործընկերների հետ»,- նշել է Շիսյունը։
Հարցին, թե Հայաստանը Մետաքսի ճանապարհին մասնակցելու է ԵՏՄ շրջանակներում, թե ինքնուրույն, նա պատասխանել է. «Ե՛վ երկկողմ, ե՛ւ բազմակողմ ձեւաչափով։ Մենք քննարկում ենք այդ հարցը։ Այստեղ ամենակարեւորն այն է, որ նախաձեռնությամբ պահպանվում է թափանցիկության սկզբունքը։ Մենք բանակցությունների ընթացքում ընդհանուր լեզու կգտնենք, համաձայնության կգանք, կաշխատենք եւ կքաղենք պտուղները»։
Անդրադառնալով NEWS.am-ի թղթակցի հարցին, թե ինչով կարող է Հայաստանը տնտեսական առումով հրապուրել Չինաստանին, Շիսյունը պատասխանեց. «Հայաստանը Չինաստանի համար առեւտրի, շփման եւ բարեկամության ոլորտներում փոխշահավետ գործընկեր է։ Բարեկամությունն ավելի կարեւոր է, քան անգամ առեւտուրը»։
Անդրադառնալով հարցին, թե որքանով է հնարավոր, որ հենց Հայաստանի տարածքով կշարունակվի Մետաքսի ճանապարհը, նա նշեց. «Մետաքսի ճանապարհը միայն մեկ ճանապարհ կամ միայն մայրուղիներ չէ»։
