Չինաստանն ակտիվ առաջ է քաշում Մետաքսի ճանապարհի տնտեսական գոտու եւ ԵՏՄ-ի համատեղ կառուցման համադրումը, ջանքեր է գործադրում Չինաստանի եւ ԵՏՄ-ի միջեւ առեւտրային ընթացակարգերի պարզեցման եւ իհարկե ազատ առեւտրի գոտի ստեղծելու վերջնական նպատակի համար։ Այս մասին նոյեմբերի 20-ին «21-րդ դարի մետաքսի ճանապարհը. Հեռանկարներ եւ համագործակցություն» համաժողովի շրջանակներում լրագրողներին ասել է Հայաստանում ՉԺՀ դեսպանատան խորհրդական Լո Շիսյունը։
Նա նշել է, որ հայկական կողմը դրական է գնահատում եւ աջակցում է Մետաքսի ճանապարհի տնտեսական գոտու համատեղ ստեղծման նախաձեռնությունը, ինչը երկկողմ փոխշահավետ համագործակցության նոր տարածք է բացում։
«Այս տարվա սկզբին Հայաստանը միացավ ԵՏՄ-ին, ինչը երկրին թույլ է տալիս դուրս գալ 170-միլիոնանոց շուկա։ Այս հանգամանքը լրացուցիչ հնարավորություններ է բացում հայ-չինական ներդրումային համագործակցության համար»,- նշել է Շիսյունը։
Նա համոզմունք է հայտնել, որ Մետաքսի ճանապարհի տնտեսական գոտու համատեղ շինարարությունը հայ-չինական գործնական եւ հումանիտար համագործակցության խորացման համար նոր հնարավորություններ կբացի։
«Չինական կողմը պատրաստ է առաջ տանել ներդրումային համագործակցությունն այնպիսի ոլորտներում, ինչպիսիք են տրանսպորտային եւ էներգետիկ օբյեկտները, գունավոր մետաղը, շինանյութերը, էլեկտրատեխնիկան եւ թեթեւ արդյունաբերությունը, զբոսաշրջության զարգացումը»,- հավելել է Լո Շիսյունը։
