2016 թվականին Երեւանում գյուղատնտեսական տարբեր մթերքների օրեր կկազմակերպվեն: Այս մասին, այսօր՝ նոյեմբերի 20-ին, Երեւանի քաղաքապետ Տարոն Մարգարյանի հետ հանդիպման ժամանակ նշել է ՀՀ գյուղատնտեսության նախարար Սերգո Կարապետյանը:
Գյուղնախից NEWS.am-ին հայտնում են, որ կողմերը գոհունակություն են հայտնել երկու գերատեսչությունների միջեւ վերջին տարիների ընթացքում ձեւավորված փոխշահավետ համագործակցության վերաբերյալ` շեշտելով դրա ընդլայնման անհրաժեշտությունը:
«Այժմ մենք նպատակ ունենք գալիք տարվանից մայրաքաղաքում նախաձեռնել եւ կազմակերպել գյուղատնտեսական տարբեր մթերքների օրեր, իսկ առաջիկայում նախատեսում ենք կազմակերպել նաեւ գինու փառատոն, որը կկրի ամենամյա բնույթ»,-զրույցի ընթացքում նշել է նախարար Կարապետյանը:
Նախարարը համոզմունք է հայտնել, որ համագործակցության շրջանակների ընդլայնումն ու ամրապնդումը կնպաստի գյուղացիների եւ քաղաքաբնակների միջեւ շփումների ակտիվացմանը, ինչն էլ կխթանի հայկական գյուղմթերքի արտադրանքի իրացման ծավալների ավելացմանը` մայրաքաղաքի բնակիչներին ապահովելով թարմ, բարձրորակ, մատչելի գներով գյուղատնտեսական մթերքով:
Սերգո Կարապետյանը եւ Տարոն Մարգարյանը հատկապես կարեւորել են համատեղ ջանքերով 2011 թվականից Երեւան քաղաքում գյուղատնտեսական տոնավաճառների կազմակերպումը` որպես հաջողված նախաձեռնություն:
«Երեւանում գյուղատնտեսական շուկաներ ունենալու նախաձեռնությունն իսկապես սպասված էր մայրաքաղաքի բնակիչների կողմից, ինչը ոչ միայն գյուղացիների համար առանց միջնորդի իրենց արտադրանքը վաճառելու լավ հնարավորություն է, այլեւ մայրաքաղաքի բնակչությանն է հնարավորություն ընձեռում առավել մատչելի գներով ձեռք բերելու գյուղացիական արտադրության մթերքը: Ելնելով մայրաքաղաքի բնակիչների պահանջարկից` Երեւանի քաղաքապետարանը հատկացրել ու պատրաստ է անհրաժեշտության դեպքում մայրաքաղաքի վարչական շրջաններում համապատասխան նոր տարածքներ եւս հատկացնել գյուղմթերքի շուկաների կազմակերպման համար», - ընդգծել է քաղաքապետ Տարոն Մարգարյանը:
Հանդիպման շրջանակում Գյուղատնտեսության նախարարության եւ Երեւանի քաղաքապետարանի միջեւ ստորագրվել է ագրոպարենային ոլորտի բնականոն գործունեությունն ու զարգացումն ապահովելու նպատակով համագործակցության հուշագիր:
Հուշագիրը նպատակաուղղված է Հայաստանի Հանրապետության տնտեսության, մասնավորապես ագրոպարենային ոլորտի համամասնական ու կայուն զարգացմանը, հայրենական արտադրության լավագույն արտադրանքի գովազդմանը, ճանաչման ու սպառման մակարդակի ավելացմանը, պետական եւ տեղական ինքնակառավարման մարմինների միջեւ փոխշահավետ համագործակցության ընդլայնմանը:
Հանդիպման ավարտին Սերգո Կարապետյանը Երեւանի քաղաքապետ Տարոն Մարգարյանին պարգեւատրել է ոսկե մեդալով: