«Իմ Հայաստան» ծրագրի նպատակն է նպաստել նրան, որ Հայաստանը աշխարհի քարտեզի վրա ճանաչվի, որպես համաշխարհային կարգի զբոսաշրջային երկիր: Այս մասին նոյեմբերի 20-ին հայտնել է Հայաստանում ԱՄՆ արտակարգ ու լիազոր դեսպան Ռիչարդ Միլսը՝ ելույթ ունենալով «Իմ Հայաստան» ծրագրի մեկնարկին նվիրված միջոցառման ընթացքում, որի նպատակն է երկրում մշակութային զբոսաշրջությունը զարգացնելու միջոցով խթանել ազգային մշակույթի պահպանումը:
Հայաստանում, դեսպանի խոսքով, հարուստ ժառանգություն կա, Հայաստանը շատ հյուրասեր երկիր է: Միլսը նկատեց, որ «Իմ Հայաստանը» չորս տարվա ծրագիր է՝ 5 մլն դոլար ֆինանսական բազայով: Ծրագրի իրականացման ժամանակ օգտագործվելու է Հայաստանի ամբողջ ներուժը: «Հայաստանում գոյություն ունեցող պատմամշակութային հուշարձանները կհամադրվեն մեր փորձի հետ, որպեսզի ձեւավորենք հետաքրքիր փաթեթ, որը գրավիչ կլինի զբոսաշրջիկների համար ու կոգեշնչի Հայաստան այցելել»,- նկատեց դեսպանը: Նա շեշտեց, որ այս ծրագիրը կարող է օգտակար լինել նաեւ Հայաստանի տնտեսության համար: «Հայաստան այցելող զբոսաշրջիկների մեծ մասը հակված է մնալ մայրաքաղաքում ու միայն մեկ օրով է այցելում Երեւանին հարակից վայրեր: Այդ ծրագրի նպատակն է նպաստել նրան, որ զբոսաշրջության տնտեսական օգուտները լայնորեն տարածվեն ամբողջ երկրում»,- ասել է Ռիչարդ Միլսը:
