Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում վերսկսվել է «Նորք» ինֆեկցիոն հիվանդանոցում 2011թ. ջրծաղիկ հիվանդությունից մահացած ժամկետային զինծառայող Հայկ Խաչատրյանի գործով քննությունը:
NEWS.am-ի թղթակցի հետ զրույցում գործով համաներմամբ ազատ արձակված Միքայել Միքայելյանի փաստաբան Վարդուհի Էլբակյանը հայտնեց, որ ինքն առաջին դատական նիստին միջնորդել է, որ զինծառայող տուժողի կարգավիճակը դադարեցվի:
«Դատարանը ժամանակ խնդրեց՝ միջնորդությունը քննարկելու եւ որոշում կայացնելու համար: Այդ պատճառով նիստը հետաձգվել է եւ նշանակվել դեկտեմբերի 2-ին»,- ասաց փաստաբանը:
Հիշեցնենք, որ զինծառայող Հայկ Խաչատրյանի մահվան փաստի առթիվ հարուցված քրեական գործով` ՀՀ ՔՕ 376 –րդ հոդվածի 1-ին մասի հատկանիշներով (ծառայության նկատմամբ անփույթ վերաբերմունքը), մեղադրանք էր առաջադրվել Կենտրոնական կլինիկական զինվորական հոսպիտալի նախկին պետ, գլխավոր վիրաբույժ Միքայել Միքայելյանին եւ նույն հոսպիտալի նյարդաբանական բաժանմունքի նախկին պետ, փոխգնդապետ Մինաս Մկրտչյանին:
2015թ. փետրվարի 5-ին առաջին ատյանի դատարանը որոշում էր կայացրել քրեական գործի վարույթը կարճել համաներման մասին ՀՀ Ազգային ժողովի որոշման համաձայն: Վերաքննիչ դատարանը բեկանել էր առաջին ատյանի կայացրած որոշումը եւ գործն ուղարկել առաջին ատյանի դատարան: