Գյումրիում հունվարի 12-ին Ավետիսյանների սպանության գործով տուժողի իրավահաջորդների ներկայացուցիչները բողոքարկել են քննիչի այն որոշումը, որով մերժվել էր փաստաբանների ներկայացրած միջնորդությունը: Այս մասին NEWS.am-ի հետ զրույցում ասաց տուժողի իրավահաջորդի ներկայացուցիչ, փաստաբան Լուսինե Սահակյանը:
Նշենք, որ նախաքննության ավարտից հետո՝ նյութերին ծանոթանալու փուլում, փաստաբանները միջնորդություն էին ներկայացրել, որը վարույթն իրականացնող մարմինը մերժել էր եւ մեղադրական եզրակացությամբ գործն ուղարկել դատախազություն:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով, դասալքության մեղադրանքով:
2015թ. հոկտեմբերի 16-ին Վալերի Պերմյակովին հայկական կողմը մեղադրանք է առաջադրել Քրեական օրենսգրքի 104-րդ հոդվածի 2-րդ մասի 1-ին, 5-րդ, 8-րդ կետերով, 175-րդ հոդվածի 2-րդ մասի 3-րդ, 4-րդ կետերով եւ 34-329-րդ հոդվածի 1-ին մասով։