Բաքվի Նարդարան թաղամասում հանրահավաք է տեղի ունեցել, որի ժամանակ խիստ հակասեմական կարգախոսներ են հնչել: Ինչպես հաղորդում է ադրբեջանական APA գործակալությունը, ակցիայի ժամանակ ելույթ ունեցող Հաջի Հուսեյնովը աշխարհի բոլոր մահմեդականներին եւ ադրբեջանցիներին կոչ է արել միավորվել ընդդեմ ԱՄՆ-ի եւ միջազգային սիոնիզմի: Հաջի Նուրին, իր հերթին, նշել է, որ սիոնիզմն այսօր կորցրել է հեղինակությունը քաղաքակիրթ աշխարհում: Ադրբեջանական հասարակությունում ատելություն է առաջ եկել Իսրայելի եւ սիոնիզմի նկատմամբ: Նա ընդգծել է, որ ղարաբաղյան խնդիրը նման է պաղեստինյալ խնդրին: Նուրին պահանջել է անմիջապես ազատ արձակել այն անձանց, ովքեր փորձել են ակցիա անցկացնել Իսրայելի դեսպանատան դիամց:
«Միասնություն» կուսակցության նախագահ Խուդու Խուդիեւը մեղադրել է Եվրոպական երկրներին ու ԱՄՆ-ին երկերեսանիության մեջ: Հաջի Վելիեւը հայտարարել է, որ հավատում է աշխարհի մահմեդականների հաղթանակին:
Հանրահավաքում հնչել են ծայրահեղական կարգախոսներ. «Մահ ԱՄՆ-ին», «Մահ Իսրայելին» եւ այլն: Ակցիայի ավարտին մասնակիցներն այրել են Հայաստանի, Իսրայելի, ԱՄՆ-ի եւ Մեծ Բրիտանիայի պետական դրոշները, ինչպես նաեւ Իսրայելի վարչապետ Բենյամին Նաթանյահուի խրտվիլակը: