Վրաստանը երկիր է, որը կանգնած է լուրջ մարտահրավերների առջեւ եւ նրան ուժեղ նախագահ է անհրաժեշտ: Սեպտեմբերի 3-ին նման հայտարարություն է արել Միխայիլ Սահակաշվիլին՝ Անակլիայում խորհրդարանական մեծամասնության առջեւ խոսելով Վրաստանի նոր սահմանադրության նախագծի մասին:
Նրա խոսքով, առանց ուժեղ նախագահի անհնար է ղեկավարել երկիրը: « Ես չեմ համաձայնվի եվրոպացիների խորհուրդների հետ՝ սահմանափակել նախագահի լիազորությունները»,- ասել է նա:
Սահակաշվիլին անդրադարձել է նաեւ իր մահացու թշնամի Ռուսաստանին:
«Վրաստանի կառավարման մոդելը, որը ձգտում են փոխառել հետխորհրդային երկրների շատ ներկայացուցիչներ, մահացու վտանգ է ներկայացնում Ռուսաստանի ղեկավարության համար»,- ասել է Վրաստանի նախագահը: Որպես օրինակ, փողկապներ ծամելու սիրահարը բերել է Մոլդովան, որն, իր խոսքով, «Վրաստանի պես երիտասարդ կառավարության կարիք ունի»:
Անդրադառնալով Մեդվեդեւի հայտարարություններին՝ Սահակաշվիլին հայտարարել է. «Նրա ողջ ելույթը հիմնված էր այն օրինակի վրա, թե ինչ է կատարվում Վրաստանում եւ ավարտվեց միլիցիան ոստիկանություն անվանելով, կարծես դա ինչ-որ բան փոխում է»:
Վրաստանի նախագահը զուգահեռներ է անցկացրել՝ Ռուսաստանին «քրեական հեղինակություն», իսկ Վրաստանին «չենթարկվող գերազանցիկ» անվանելով: Ըստ Սահակաշվիլիի, «գերազանցիկի» առկայությունը վտանգի տակ է դնում քրեական հեղինակության գոյությունը:
