Հայաստանում հասունացել է մի իրավիճակ, որը կարող է բերել հեղափոխության, եւ դեկտեմբրի 1-ից Ազատության հրապարակում ժողովուրդը պահանջելու է իշխանափոխություն: Այս մասին այսօր` նոյեմբերի 23-ին, լրագրողների հետ զրույցում ասաց «Ժառանություն» կուսակցության փոխնախագահ Արմեն Մարտիրոսյանը:
«Միգուցե ճիշտ է, որ անհնարին է իշխանափոխությունը, բայց չմոռանանք, որ ատելություն գոյություն ունի իշխանության նկատմամբ երկրում, եւ դա ցանկացած պահի կարող է ինչ-որ գործընթացների բերել: Իրավիճակից ելնելով, որեւէ մեկը չի կարող ասել, թե զարգացումները որ ուղղությամբ կգնան: Միանշանակ մենք այնպիսի իրավիճակ չենք ունենա, ինչպիսին էր մարտի 1-ին: Մեկ օրում հեղափոխություն չի լինում, սակայն, այս ամենը ցույց է տալիս, որ չի կարող հեղափոխական իրավիճակ չլինել երկրում, ժողովուրդը ցանկացած պահի կարող է դուրս գալ փողոց եւ պահանջել իշխանափոխություն: Որեւ մեկը չի ուզում արյունահեղություն եւ այս առումով, իշխանությունները պետք է խոհեմ լինեն: Կա իրավիճակ եւ այս իրավիճակը լուծել է պետք»,-ասաց Արմեն Մարտիրոսյանը:
ԱԺ ՀՀԿ խմբակցության պատգամավոր Տաճատ Վարդապետյանն էլ նշեց, որ աշխարհի ցանկացած երկրում էլ ժողովրդի շրջանում կան դժգոհություններ, սակայն իշխանությունների նկատմամբ ատելության քարոզումը ոչ մի լավ բանի չի կարող հանգեցնել:
«Հասարակությանը նոր ցնցումների մղելը Հայաստանի շահերից չի բխում, կարծում եմ, որ ամեն ինչ նորմալ է ընթանալու եւ այս գործընթացը համերաշխության եզրեր կունենա եւ միգուցե այս անգամ եւս ամեն ինչ մոմավառությամբ ավարտվի»,-ասաց նա: