Կրեմլը չի մեկնաբանում ռուսական կործանիչի խոցման միջադեպի պատճառով «Թուրքական հոսքը» կառուցելուց հրաժարվելու եւ Թուրքիայի հետ ավիահաղորդակցությունը դադարեցնելու հնարավորությունը: Այս մասին ասել է ՌԴ նախագահի մամուլի քարտուղար Դմիտրի Պեսկովը:
«Առայժմ չեմ կարող պատասխանել այդ հարցին: Նախագահն ասաց, որ Մոսկվան մանրամասն կվերլուծի իրավիճակը»,- լրագրողներին ասել է Պեսկովը:
Ըստ ՌԻԱ Նովոսստիի, նա չի մեկնաբանել նաեւ Ռուսաստանի եւ Թուրքիայի միջեւ ավիահաղորդակցության դադարեցման հնարավորության մասին հարցը: «Չեմ կարող այդ մասին ոչինչ ասել: Այդ մասին խոսք չի եղել: Սակայն հստակ պետք է գիտակցել, որ այդպիսի գործողություններն անհետեւանք չեն մնում»,- ընդգծել է Պեսկովը:
Հիշեցնենք, որ նոյեմբերի 24-ին Սիրիայում կործանվել է ռուսական Սու-24 ինքնաթիռը: ՌԴ նախագահ Վլադիմիր Պուտինը հայտարարել է, որ այն խոցվել է թուրքական F-16 կործանիչի կողմից եւ ընկել Սիրիայի տարածքում, Թուրքիայի հետ սահմանից 4 կմ հեռավորությամբ: