Ռուսաստանը Թուրքիայի կողմից խոցված Սու-24 օդանավի կապակցությամբ ՆԱՏՕ-ից օբյեկտիվություն չի ակնկալում, բայց պատրաստ է համաձայնություն կնքել դաշինքի հետ նման միջադեպերից խուսափելու համար։ Այս մասին ԱՄՆ փոխպետքարտուղար Ռոուզ Գոթեմյուլերի հետ հանդիպումից հետո ասել է ՌԴ փոխարտգործնախարար Սերգեյ Ռյաբկովը։
«Ես չեմ կարծում, որ այս հարցում ՆԱՏՕ-ի մեր գործընկերներից կարելի է օբյեկտիվություն ակնկալել, քանի որ նրանք պաշտպանում են Թուրքիային՝ որպես դաշնակցի»,- ասել է դիվանագետը։ Ռյաբկովը կոչ է արել միջոցառումներ իրականացնել՝ այլեւս նման աննախադեպ եւ հանցավոր հարձակումներ թույլ չտալու համար։ Նրա խոսքով՝ Մոսկվան պատրաստ է դիտարկել ՆԱՏՕ-ի հետ համապատասխան համաձայնագիր կնքելու հարցը։ «Եթե ՆԱՏՕ-ն՝ որպես կազմակերպություն, հիմա դիրքորոշում ձեւակերպի հօգուտ ինչ-որ հավաքական բազմակողմանի փաստաթղթի, մենք դա կդիտարկենք։ Բայց մեծ հաշվով դա նույնն է, թե հեծանիվ հայտնագործես»,- նշել է փոխարտգործնախարարը։
Նշենք, որ ավելի վաղ ՆԱՏՕ-ում ՌԴ մշտական ներկայացուցիչ Ալեքսանդր Գրուշկոն հայտարարել էր, որ Թուրքիան ՆԱՏՕ-ին հարկադրել է արդարացնել ռուսական ռմբակոծիչի խոցման փաստը։ Այդպիսով, ինչպես կարծում է Գրուշկոն, դաշինքը հաստատել է, որ ղեկավարվում է բացառապես քաղաքական նպատակահարմարությունից։
