Գերմանիայի փոխկանցլեր, Սոցիալ դեմոկրատական կուսակցության ղեկավար Զիգմար Գաբրիելը սուր քննադատության է ենթարկել Թուրքիային ռուսական օդանավը խոցելու կապակցությամբ։
«Սու-24 օդանավը խոցելու միջադեպն առաջին անգամ ցույց տվեց, որ մենք տարածաշրջանում գործ ունենք մի խաղացողի հետ, որն անկանխատեսելի է։ Դա Թուրքիան է եւ ոչ թե ռուսները։ Տարածաշրջանում իրական անկանխատեսելի ռիսկը Անկարան է եւ ոչ թե Մոսկվան։ Այն, որ ռուսները օդային սահմանը հատելով առճակատման են գնացել, չպիտի մեզ մոլորության մեջ գցի եւ թաքցնի այն փաստը, որ Թուրքիան նույնպես այստեղ բարդ դեր է խաղում»,- ասել է փոխկանցլերը DPA գործակալությանը։
Հիշեցնենք, որ նոյեմբերի 24-ին թուրք-սիրիական սահմանին Թուրքիայի ՌՕՈւ կողմից խոցվել էր ռուսական Սու-24 ռմբակոծիչը։ Ռուսական կողմը պնդում է, որ կործանիչը թռիչք է իրականացրել բացառապես Սիրիայի տարածքում։ Թուրքիան իր հերթին հայտարարում է, որ կործանիչը խոցվել է թուրք-սիրական սահմանը հատելուց հետո։
