Դեկտեմբերի 1-ին պետք է հայ ազգը գնա Երեւանի Ազատության հրապարակ եւ պայքարի հանուն Հայաստան պետության ապագայի: Այս մասին այսօր` նոյեմբերի 25-ին, լրագրողների հետ զրույցում ասաց դրամատուրգ, մշակութաբան Խաչիկ Չալիկյանը:
«Դեկտեմբերի մեկը մեր ժողովրդին պետք է արթնացնի եւ պետք է պայքարենք հանուն մեր պետության: Մենք ընդդիմություն չենք, ընդդիմությունն իշխանությունն է, որը դեմ է իր ազգին, պետությանը: Ազատության հրապարակ է անհրաժեշտ գնալ, դեկտեմբերի մեկին պետք է ծնվի նոր երկիր, որը պետք է լուսավորի ժողովրդին: Այսօր մենք Ադրբեջանի հետ նույն նժարի վրա ենք հայտնվել, այսօրվա ինքնակոչներն իրականացնում են բոլորի կողմից դատապարտված ծրագիր»,-ասաց նա:
Գիտնական, Գիտության եւ առաջատար տեխնոլոգիաների ազգային հիմնադրամի հիմնադիր նախագահ Հարություն Կարապետյանը երիտասարդ գիտաշխատողներին ու ուսուցիչներին նույնպես կոչ արեց դեկտեմբերի 1-ին գնալ Ազատության հրապարակ, մասնակցել «Նոր Հայաստան» հանրային փրկության ճակատի հրավիրած համազգային հանրահավաքին:
«Իշխանությունները գիտությունը վերացման եզրին են կանգնեցրել, եթե մտածում են գիտության մասին, թող գնան Ազատության հրապարակ ու պայքարեն: Իշխանությունները գիտության զարգացման համար ոչինչ չեն անում, որի հետեւանքով շուտով կվերանան դրպոցները, համալսարանները եւ այլ գիտական կենտրոններ»,-ասաց Հարություն Կարապետյանը:
Սահմանադրակն փոփոխությունների դեմ պայքարող գեղանկարիչ, ազատամարտիկ, Նիկոլ Աղաբաբյանն էլ նշեց, որ կարեւոր չէ, թե ով կղեկավարի Հայաստանը, կարեւորը գործող իշխանություններից օր առաջ ազատվելն է:
«Չեն էլ ամաչում, գնում են գյուղեր, էլի խաբում են խեղճ ժողովրդին: Կարտոշկա են կլպում, մայմունություններ են անում, գիշերներն էլ խեղճ ժողովրդի տներն են գնում, երեւի վերջին հացն են ուտում: Չի բացառվում, որ Հայաստանը կորցնենք, կարծես ամեն ինչ արվում է, որ Հայաստանը դատարկվի: Խաղաղ պահանջներով պետք է հասնենք մեր նպատակին: Եւ մի բան էլ ասեմ, ոստիկանների ֆունկցիան է Հայաստանի քաղաքացիների անվտանգությունը պաշտպանել, ոչ թե իշխանությունների, թող կանգնեն ժողովրդի կողքին»,-ասաց Նիկոլ Աղաբաբյանը:
Նշենք, որ «Նոր Հայաստան» հանրային փրկության ճակատը դեկտեմբերի 1-ին Երեւանի Ազատության հրապարակում հրավիրել է համազգային հանրահավաք` պայքարելու գործող իշխանությունների դեմ:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: