Հայկական կամ ղարաբաղյան կողմը պետք է համարժեք պատասխան տա Ադրբեջանի կողմից իրականացվող դիվերսիոն գործողություններին,եւ այդ պատասխանը չպետք է լինի միայն դիվանագիտական մակարդակով: Այս մասին NEWS.am-ի թղթակցի հետ զրույցում ասաց ԱԺ ՀՀԿ խմբակցության պատգամավոր, Արտաքին հարաբերությունների մշտական հանձնաժողովի նախագահի տեղակալ Վազգեն Կարախանյանն՝ անդրադառնալով այսօր՝ սեպտեմբերի 4-ին տեղի ունեցած ադրբեջանական հերթական դիվերսիային: Նա նշեց, որ Ադրբեջանն այսպիսի նյարդային շարժումներով փորձում է ցույց տալ, որ իր համբերությունը հատել է, քանի որ ԼՂ բանակցություններն իր ուզած հունով չեն ընթանում: «Արդբեջանի կողմից իրականացվող դիվերսիոն գործողությունները դիվանագիտական եւ ներքին ռեսուրսներին չտիրապետելու հետեւանք են: Կարախանյանը չի բացառում, որ ադրբեջանական կողմը, հաճախակիացնելով իր դիվերսիոն գործողությունները, փորձում է հող նախապատրաստել ռազմական գործողությունները վերսկսելու համար:
«Սակայն չեմ կարծում, որ պատերազմի վերսկսման հավանականությունը ռեալ է: Ցանկացած պատերազմող կողմ, եթե ինքն է սկսում, ուրեմն վստահ գիտի, որ ինքը հաղթելու է: Իսկ այս պահին չեմ կարծում, որ Ադրբեջանի հաշվարկները դա են ցույց տալիս»,- նշեց պատգամավորը: Նրա խոսքով՝ միջազգային հանրությունը պետք է «ճշմարտացի եւ իրական» պատասխան տա Ադրբեջանի գործողություններին, ինչը, սակայն չի անում: «Միջազգային հանրությունն էլ շատ անգամ խախտում է ճշմարտության սկզբունքները եւ արձագանքելիս ելնում է միայն իր ազգային շահերից: Այդ մասին են վկայում միջազգային հանրույթի որոշ ներկայացուցիչների կողմից հաճախ արվող ոչ ադեկվատ հայտարարությունները»,- հայտարարեց ՀՀԿ-ական պատգամավորը:
Նշենք, որ սեպտեմբերի 4-ին՝ ժամը 06:50-ի սահմանում ղարաբաղա-ադրբեջանական զորքերի շփման գոտու հյուսիսարեւելյան ուղղությամբ (Ջրաբերդ բնակավայրից մոտ 2կմ արեւելք) արձանագրվել է հակառակորդի հետախուզական-դիվերսիոն խմբի հերթական առաջխաղացման փորձ: ԼՂՀ ՊԲ առաջապահ ստորաբաժանումների կողմից ձեռնարկված համապատասխան գործողությունների եւ ծավալված մերձամարտի արդյունքում ադրբեջանական գրոհայինները` ՊԲ մարտական հենակետում թողնելով 1 դիակ, հետ են շպրտվել: Փախուստի ճանապարհին դիվերսիոն խմբի անդամները պայթել են ականների վրա, կան վիրավորներ:
Ըստ հետախուզական տվյալների՝ նրանցից մեկը Ադրբեջանի ԶՈւ հետախուզական, մյուսը՝ սակրավորային վաշտի հրամանատար է: Ղարաբաղյան կողմից կորուստներ չկան:Ադրբեջանցի հրոսակները դիվերսիոն գործողություններ էին իրականացրել նաեւ օգոստոսի 31-ին Ադրբեջանի եւ Լեռնային Ղարաբաղի զինված ուժերի շփման գծում՝ Վերին Չայլու բնակավայրի ուղղությամբ: Մերձամարտի արդյունքում վնասվածքներ էր ստացել ԼՂՀ Պաշտպանության բանակի զինծառայող Ռուդիկ Մանասերյանը: Իսկ հունիսի 18-ին Չայլուի ուղղությամբ Լեռնային Ղարաբաղ էր ներխուժել ադրբեջանական զինված դիվերսիոն խումբը: Մարտի ընթացքում հայկական կողմը կորցրել էր 4 զինվոր, եւս 4-ը՝ վիրավորվել էին:
