Թուրքիայի նախագահ Ռեջեփ Թայիփ Էրդողանը փորձել է զանգահարել Ռուսաստանի նախագահ Վլադիմիր Պուտինին «Սու 24»-ի վրա հարձակումից 7-8 ժամ հետո, այս տեղեկությունը հաստատել է ՌԴ նախագահի մամուլի քարտուղար Դմիտրի Պեսկովը:
«Այո, դա եղել է միջադեպից մոտավորապես 7-8 ժամ հետո, ոչ ավելի շուտ»,- ճշգրտել է Կրեմլի ներկայացուցիչը
Նրա խոսքով, «այդ հարցման մասին նախագահին զեկուցել են»: Պեսկովը հրաժարվել է պատասխանել ճշգրտող հարցերին ՝ ասելով.«Ես միայն այսքանը կարող եմ ասել»:
Դմիտրի Պեսկովը նաեւ հայտնել է, որ ռուսական «Սու 24»-ի վրա թուրքական ՌՕՈՒ հարձակումից հետո նախագահների միջեւ որեւէ շփում դեռ չի եղել: Այն հարցին, թե ինչ վիճակում է հիմա Թուրքիայի հետ Ռուսաստանի երկխոսությունը, Պեսկովը պատասխանել է, որ «հիմա այն ոչ մի վիճակում էլ չէ, այն պարզապես գոյություն չունի»:
Նոյեմբերի 30-ին Փարիզում կլիմային նվիրված համաժողովի շրջանակում Ռուսաստանի ու Թուրքիայի նախագահների հանդիպում ծրագրված չէ, այս մասին նույնպես հայտնել է ՌԴ նախագահի մամուլի քարտուղարը, փոխանցում է ՏԱՍՍ-ը:
«Նախագահին զեկուցել ենք այդ հարցման մասին (Պուտինի հետ հանդիպելու վերաբերյալ Էրդողանի հարցման): Ոչ մի առանձին հանդիպում Փարիզում չի ծրագրվում ու չի քննակվում,- հայտնել է նա լրագրողներին,- Ես այս պահին ոչ մի տեղեկություն չունեմ (նախագահների) ծրագրված հեռախոսազրույցների մասին »:
Ավելի վաղ Թուրքիայի նախագահ Թայիփ Էրդողանը հայտնել էր, որ «Սու 24»-ի հետ կատարված միջադեպից հետո փորձել է զանգահարել Վլադիմիր Պուտինին, սակայն հեռախոսազրույցը չի կայացել: Նաեւ Էրդողանի խոսքով, ինքը հանդիպում է խնդրել ՌԴ նախագահի հետ նոյեմբերի 30-ին Փարիզում, բայց ռուսական կողմից դեռ պատասխան չի ստացել: