Արարատի մարզում սեպտեմբերի 10-ին զանգվածային թունավորման գործով մեղադրյալ Գրիգոր Նազարյանն իրեն առաջադրված մեղադրանքը չի ընդունում:
«Թյուրիմացություն է եղել, ես մեղավոր չեմ»,- NEWS.am-ի թղթակցի հետ զրույցում ասաց Գրիգոր Նազարյանը, որը դպրոցներին սնունդ մատակարարած «Գոհար Սարգսյան» ՍՊԸ-ի աշխատակից է:
Նշենք, որ գործն արդեն ուղարկվել է Արարատի եւ Վայոց ձորի մարզերի ընդհանուր իրավասության դատարանում:
Ըստ մեղադրական եզրակացության՝ «Գոհար Սարգսյան» ՍՊԸ-ի աշխատակից Գրիգոր Նազարյանը Բաղրամյան գյուղում գտնվող հրուշակեղենի արտադրամասում չի պահպանել «Սննդամթերքի հիգենային ներկայացվող պահանջների տեխնիկական կանոնակարգը հաստատելու մասին» որոշման պահանջները: Որպես սննդի շղթայի օպերատոր՝ Գրիգոր Նազարյանը, սեպտեմբերի 9-10-ն ընկած ժամանակահատվածում չի իրականացրել վտանգի աղբյուրների վերլուծության հիգենիկ պատշաճ գործելակերպի կանոնների համատեղ կիրառումն ամրապնդող վերահսկողություն: Սրա հետեւանքով արտադրվել է սպառողների առողջության անվտանգության պահանջներին չհամապատասխանող հրուշակեղեն, այն է` երկրոդային աղտոտվածությամբ` ԱՑԽՄ /Աղիքային ցուպիկ/ եւ Բացիլուս Ցերեուս /Bacillus cereus/ տեսակի մանրէներով ախտահարված հրուշակեղեն:
Արտադրված ապրանքը սեպտեմբերի 10-ին Նազարյանն առաքել է Բաղրամյան եւ Այգեզարդ գյուղերի միջնակարգ դպրոցներ, որտեղ էլ վաճառվել է դպրոցականներին: Արդյունքում նույն օրը Այգեզարդի միջնակարգ դպրոցի 8 եւ Բաղրամյանի միջնակարգ դպրոցից 44 աշակերտ թունավորման ախտանիշներով հոսպիտալացվել է հիվանդանոց:
Գրիգոր Նազարյանին մեղադրանք է առաջադրվել Քրեական օրենսգրքի 279-րդ հոդվածի 2-րդ մասի 1-ին եւ 2-րդ կետով: Խափանման միջոց է ընտրվել ստորագրություն չհեռանալու մասին:
Ավելի վաղ հայտնել էինք, որ սեպտեմբերի 10-ին Արարատի մարզում զանգվածային թունավորում էր տեղի ունեցել. Բաղրամյան գյուղի 38 եւ Այգեզարդի 8 դպրոցականներ տեղափոխվել էին Արտաշատի բժշկական կենտրոն: Նախնական տվյալներով՝ երեխաները թունավորվել էին դպրոցի ճաշարաններում մատակարարվող սննդից: Պարզվել էր, որ այդ դպրոցներին սնունդ է մատակարարում միեւնույն ընկերությունը:
Ժամանակավորապես դադարեցվել է դպրոցի սննդի կետի գործունեությունը:
