Պաղեստինցին մեքենայով հարվածել է իսրայելցի զինվորականների խմբի` վիրավորելով նրանցից հինգին, որից հետո նրան գնդակահարել են, տեղեկացնում է բանակի մամուլի ծառայությունը:
Այսօր նրա մեքենայի մուտքը Հեբրոն քաղաքի մոտ գտնվող թիվ 60 մայրուղի, որը զինվորականների կարծիքով կանխամտածված է եղել, օրվա ընթացքում երկրորդն է դարձել: Մի քանի ժամ առաջ նույն` Արեւմտյան ափին պաղեստինցին երկու զինվորականի էր գցել մեքենայի տակ, նրան եւս այնուհետեւ գնդակահարել էին, տեղեկացնում է ՌԻԱ Նովոստին:
«Հինգ զինվոր վիրավորվել է Բեյթ-Ումար գյուղի մոտ ավտոմեքենայով իրականացված ահաբեկչական գործողության հետեւանքով… Ահաբեկչին գնդակահարել են, իսկ զինվորականներին տեղում բուժօգնություն տրամադրելուց հետո ուղարկել են Երուսաղեմի հիվանդանոցներ հետագա բուժման», — տեղեկացրել են զինվորականները:
Վիրավորների վիճակը գնահատվում է որպես թեթեւից մինչեւ միջին ծանրության: Գրոհողի անձը պարզվել է, նա Արեւմտյան ափի 18-ամյա բնակիչ Իսա Արաֆաթն է:
Ավտոմեքենայով այս հարձակումը շարունակել է գրեթե ամենօրյա պաղեստինյան գրոհների շարքը, որոնց մերձավորարեւելյան հակամարտության ներկայիս սրացման երկու ամիսների ընթացքում զոհ է գնացել 19 իսրայելցի: Պաղեստինյան կողմից զոհերի թիվը գերազանցում է 100 մարդը: