Մենք Ռուսաստանի «Սու-24» ռմբակոծիչը դիտավորյալ չենք խփել, դա պարզապես սահմանի խախտման ավտոմատ պատասխան է եղել։ Նման հայտարարություն է արել Թուրքիայի նախագահ Ռեջեփ Թայիփ Էրդողանը։

Թուրքական BirGun կայքի փոխանցմամբ՝ Թուրքիայի նախագահը հայտարարել է, թե ընդունելի չի ՌԴ նախագահի այն հայտարարությունը, թե Թուրքիան դիտավորյալ է խոցել Ռուսաստանին պատկանող ռազմական օդանավը։ «Մենք այս փաստի հետ կապված կանչել ենք ՌԴ դեսպանին, ռազմական կցորդին եւ փաստեր ներկայացրել։ Մենք դիտավորյալ չենք խփել, դա սահմանի խախտման ավտոմատ պատասխան է եղել»,-ասել է Էրդողանը՝ կրկին պնդելով, թե իբր ՌԴ-ի կողմից օդային հարձակման ենթարկվող շրջանում ԻՊ-ի ջոկատներ չկան։

Նշենք, որ թուրքական մամուլում կան տեղեկություններ, որ Էրդողանի նշած հատվածում ԻՊ-ի ջոկատներ չկան, սակայն կան Ալ-Կաիդային կից բազմաթիվ ահաբեկչական խմբավորումներ, որոնք ֆինանսական եւ մարդկային աջակցություն են ստանում հենց Թուրքիայից։