Երեւանի 41-ամյա բնակիչ Նորայր Սաֆարյանը դատարանի առջեւ է կանգնել իր պաշտոնը չարաշահելու եւ ծառայության նկատմամբ անփույթ վերաբերմունք դրսեւորելու համար: Նախկինում չդատված Նորայր Սաֆարյանը, լինելով ՀՀ ՊՆ զորամասի պահեստարանի պետ, կոչումով ավագ ենթասպա, չի կատարել իր վրա դրված պարտականությունների պահանջները: Նա չի հսկել ՀՀ ՊՆ պահեստարանի առավել վտանգավոր օբյեկտներում վառելիքի մաքրման աշխատանքներին, որի հետեւանքով 2013 թ. դեկտեմբերի 11-ին առանց ամբարի դիտահորի ելանցքը փակելու, բացակայել է տարածքից: Այդ ընթացքում վերանորոգման աշխատանքներ կատարելու նպատակով «Վարգոս» ԲԲԸ աշխատակիցներ Մամիկոն Զաքարյանը, Արման Առաքելյանը եւ Համլետ Գեւորգյանը` չունենալով համապատասխան թույլտվություն եւ համապատասխան անհատական պաշտպանական միջոցներ, դիտահորի բաց ելանցքով մտել եւ իջել են առանց հսկողության թողնված ՀՀ ՊՆ զորամասի տարածքում տեղակայված վառելիքի առկայության պայմաններում պայթունավտանգ օբյեկտ:
Մամիկոն Զաքարյանը, Արման Առաքելյանը եւ Համլետ Գևորգյանը, չպահպանելով պայթյունավտանգ օբյեկտներում աշխատանքներ կատարելու անվտանգության կանոնները` բացել են տարողության կցաշուրթը, որտեղ առկա վառելիքի գազերի մեծ արտահոսքի ներթափանցման հետեւանքով չկարողանալով դուրս գալ պահեստարանից` նավթամթերքի գազերով թունավորման ֆոնի վրա սուր շնչառական անբավարարվածությունից Մամիկոն Զաքարյանը եւ Արման Առաքելյանը մահացել են։
Նորայր Սաֆարյանին մեղադրանք է առաջադրվել ՔՕ 376-րդ հոդվածի 2-րդ մասով`
ծառայության նկատմամբ պետի կամ պաշտոնատար անձի անփույթ վերաբերմունքը, որը պատճառել է էական վնաս, որը պատժվում է կարգապահական գումարտակում պահելով՝ առավելագույնը երկու տարի ժամկետով, կամ ազատազրկմամբ՝ առավելագույնը երեք տարի ժամկետով: